0:00 / 0:00

Қазақстанда жыл сайынғы емханаға тіркеу науқаны басталды. Екі айға созылатын жыл сайынғы дәстүрлі кампания 15 қарашада аяқталады. Науқанның мақсаты - қаралып жүрген емханасына көңілі толмайтын азаматтарға емдеу мекемесін ауыстыруға мүмкіндік беру. Сондай-ақ, бұл шара рынокқа жаңадан қосылған медицина ұйымдарының келер жылы халыққа қызмет көрсетуге тапсырыс алуына жағдай жасау мақсатында өткізіледі."Былтырғы тіркеу науқаны барысында 300 мыңнан астам қазақстандық азамат емхана таңдау құқығын пайдаланған. Отбасылық қызмет көрсету және медициналық-санитарлық көмектің қолжетімділігі принциптерін іске асыру үшін емхананың үйге жақын маңда болғаны дұрыс. Бұл үйде біреу ауырып, өзін жайсыз сезінген жағдайда дәрігерлердің жедел көмек көрсетуіне мүмкіндік береді. Оны үкімет порталы арқылы онлайн режимінде және Халыққа қызмет көрсету орталықтары арқылы тіркеле алады". Емханаға тіркелу үшін жеке куәлік пен бас дәрігердің атына жазылған өтініш талап етіледі. Ал, egov.kz порталы арқылы тіркелу үшін жүйеге кіріп, электронды өтінімді толтырасыз. Қызметтің нәтижесі өтініш берушінің Жеке кабинетіне жолданады. Биылғы тіркеу науқанына облыстағы барлық медициналық ұйым қатысып жатыр. Мәселен №3 қалалық емхана 46 мың тұрғынға медициналық көмек көрсетуге қауқарлы.Осы орайда ұйым басшылығы науқан басталғалы емханаға тіркеуге тұруға ниет танытқандар қатары аз емес екенін тілге тиек етті.