Батыс Қазақстан облысы бойынша Мемлекеттік кірістер департаменті басқармасының бұрынғы басшысы 100 миллион теңге пара алғаны үшін 10 жылға бас бостандығынан айырылды. Астана қаласының қылмыстық істер жөніндегі мамандандырылған ауданаралық соты Батыс Қазақстан облысы бойынша Мемлекеттік кірістер департаменті басқармасы басшысының бұрынғы міндетін атқарушысына қатысты аса ірі мөлшерде пара алу дерегі бойынша үкім шығарды. Сотта анықталғандай, 2025 жылдың қыркүйек-қазан айларында сотталушы Ресей азаматының бірімен келісіп, Батыс Қазақстан облысының аумағындағы өткізу бекеттері арқылы жүк көліктерін кедергісіз өткізу үшін ақшалай сыйақы алуға уағдаласқан. Ресейден Қазақстанға жүк тасымалдайтын көліктердің өтуіне жалпы қамқорлық жасап, кедергісіз өткізуге жәрдемдескені үшін лауазымды тұлғаға 100 миллион теңге берілген. Әңгіме барлығы 1003 жүк көлігін өткізу туралы болған. Сот процесі барысында мемлекеттік айыптаушы сотталушыны 12 жылға, ал делдалды 1 жыл 6 айға бас бостандығынан айыруды сұрады. Жаза тағайындау кезінде сот екі сотталушының да кәмелетке толмаған балалары бар екенін жеңілдететін мән-жай ретінде ескерген. Істі қарау қорытындысы бойынша негізгі сотталушы Қазақстан Республикасы Қылмыстық кодексінің 366-бабы 4-бөлігі бойынша кінәлі деп танылып, 10 жылға бас бостандығынан айырылды. Ал делдал Қылмыстық кодекстің 368-бабы 1-бөлігі бойынша кінәлі деп танылып, 1 жыл 6 ай мерзімге сотталды. Сондай-ақ, екеуінің де мүлкі тәркіленіп, белгілі бір лауазымдарды атқару құқығынан өмір бойына айырылды. Бұдан бөлек, сот қылмыстық жолмен алынғаны анықталған ақшалай қаражатты мемлекет кірісіне тәркілеу және сотталғандардан заңсыз алынған сомаларды өндіріп алу туралы шешім шығарды. Сот үкімі заңды күшіне әлі енген жоқ.