0:00 / 0:00
Жарықсыз қараңғыда отырғанша, Атом Электр Станциясын салған дұрыс деп санайды Энергетика министрі Мағзұм Мырзағалиев. 10 жылдан бері елде АЭС салу мәселесі талқыланып келеді. Алайда, әзірге нақты нүкте қойылған жоқ. Энергетика министрімен өткен баспасөз маслихатында журналистерді алаңдатқан басты сұрақ осы болды.
Бас энергетиктің қойылған сұрақтардың басым бөлігі Атом Электр Станциясына қатысты болды. Соңғы кезде бұл мәселе үкіметте жиі айтылып жатыр. Бүгінде әлемнің алты елі ғана АЭС ұстап отыр. Қазақстандықтарды алаңдататыны Чернобыль мен Фукусимада орын алған алапат апаттар қайталанбай ма? Энергетика министрі әлем көмір өндіруден бас тартып жатқанда, елде газ қоры аз болғандықтан, электр энергиясын АЭС салу арқылы ғана өндіре аламыз. Ал күн мен желден энергия тартқанымен, қажеттілікті жаппаймыз дейді . Мырзағалиев жарықсыз қараңғыда отырғанша, АЭС салған дұрыс деп санайды.
Ал атом станциясын салмас бұрын, халықтың пікірімен санасу қарастырылған ба? Министр бұл орайда қоғамның пікірі назарға алынады дейді. Дегенмен, қазақстандықтардың басым бөлігі қарсы болып жатса АЭС салынбайды ма деген сауалға, мұндай саяси шешімге жауап бере алмаймын деп, ат-тонын ала қашты. Ал әзірге станцияның қай жерде салынатыны белгісіз. Дегенмен, бір емес, бірнеше АЭС салынуы да мүмкін.
Өз кезегінде Қазақстанның стратегиялық жоспарлау және реформалар агенттігінің төрағасы Қайрат Келімбетов «Коммерсант» баспасына берген сұхбатында, АЭС салу бойынша «Росатоммен» келіссөз жүріп жатқанын айтқан. Яғни Қазақстанда реакторлық станцияны Ресей салып беруі мүмкін. Алайда, энергетика министрі бұл ақпаратты жоққа шығарып отыр.
Жалпы АЭС құрылысы орта есеппен 10 жылға созылады дейді министр. Өздеріңізге мәлім бұл мәселе 10 жылдан бері айтылып, талқыланып келеді. Бірақ әлі нақты нүкте қойылған жоқ. Министрге сенсек, станцияны салатын аймақ та әлі таңдалмаған. Жалпы АЭС салу үшін екі алаң қарастырылып жатыр. Бұған дейін "Самұрық-Қазына" қорының басшысы атом электр станциясын Алматы облысында салу тиімді деген еді. Сондай-ақ, Шығыс Қазақстан облысы да қарастырылып отыр.
