0:00 / 0:00
Орал қаласында алғаш рет заңнамалық және заңға тәуелді нормативтік актілерде сыбайлас жемқорлыққа жол бермес үшін арнайы сараптама жасайтын сарапшыларды жасақтауға арналған арнайы семинар өтті. Шараға қорғаушылар, сыбайлас жемқорлыққа қарсы арнайы мониторингтік топ мүшелері мен белсенді азаматтар қатысты. Мақсат: біреу жемқорлыққа жол бермей, заң жобаларының тиімділігін арттыру.
Биылғы жылдан бастап барлық қабылданатын заңнамаларға жіті сараптама жасалмақ. Бұл өз кезегінде жаңа нормативтік құжатта жемқорлыққа жол бермес үшін керек. Сараптаманы арнайы сарапшылар корпусы зерттейтін болады. Қазіргі таңда осы сарапшы боламын деген жандарға арналған семинар ұйымдастырылып жатыр.
Сарапшы болам деп ниет білдірген жандар екі-үш кезеңді қамтитын семинардан өтіп, алған білімдерін растайтын сынақта тест тапсырады. Кейін, сарапшылар заңнамаға толықтай сараптама жасай алады. Бірақ, сарапшыға қысым көрсетілмес үшін талдау жасап жатқан жанның аты-жөні құпия болмақ. Оның сараптама материалы дайын болғаннан кейін, бұқаралық ақпарат құралдарында жарияланады. Бірақ, заңнаманы немесе жергілікті жерде заңнамалық құқықтық актілерді қабылдап отырған тарап, сарапшының ойымен келіспеуі мүмкін.
Сыбайлас жемқорлыққа қарсы іс-қимыл департаментінің мамандары жүргізген сыртқы талдаудың нәтижесінде облыс көлемінде жемқорлыққа жол беретін 3 дерек анықталыпты. Қазіргі таңда оларды түзету жұмыстары басталған.
