Өскемендегі дәмханалардың бірінде қызметтен тыс уақытта болған полиция қызметкері қаза тапты. Шығыс Қазақстан облыстық полиция департаментінің мәліметінше, қайғылы жағдай 4 қазанға қараған түні болған. 40 жастағы тәртіп сақшысы қоғамдық орында келушілердің біріне өзін дұрыс ұстамағаны үшін ескерту жасаған. Осыдан кейін олардың арасында жанжал туып, күдікті полиция қызметкеріне дене жарақатын салған. Алған жарақатынан тәртіп сақшысы көз жұмды. Оқиға кезінде тағы бір дәмхана келушісі зардап шеккен. Қылмыстық іс қозғалып, күдікті ұсталып, уақытша ұстау изоляторына қамалды. Қазір тергеу жүріп жатыр. Істің өзге мән-жайы тергеу мүддесіне байланысты жарияланбайды.