0:00 / 0:00
Міндетті әлеуметтік медициналық сақтандыру жүйесінде былықтар көп. Вице-премьер Алтай Көлгінов тілшілердің МӘМС жүйесіндегі кемшіліктер жайындағы сұрақтарына жауап берді. Кейбір медициналық ұйымдар 52 мың адамға жалған медициналық қызмет көрсеткен, -дейді вице-премьер.
2020 жылдан бері қазақстандықтар еңбекақысының 3 пайызын Міндетті әлеуметтік медициналық сақтандыру қорына аударады. Дербес төлеушілер 5 пайызын аударады. Ал азаматтық –құқықтық сипаттағы шарттар бойынша табыс алатындар өз табысының 2 пайызын осы қорға аударып отырады. Осылайша міндетті әлеуметтік медициналық сақтандыру жүйесі енгізілгелі денсаулық сақтау саласын қаржыландыру екі есеге өсті. Алайда, өз табысының белгілі бір бөлігін аударып отырған қордың жинағы қазақстандықтардың тегін медициналық көмек алуына толық мүмкіндік бермей отыр. Себебі, МӘМС жүйесінде былықтар көп. Ашықтық жоқ. Бюджет ақшасы қайда кетіп жатқаны туралы толық ақпарат жоқтың қасы. Мұны үкіметтегілер де мойындап отыр. 52 мыңға жуық шағым түскен.
Көлгінов қазір барлық былықты әшкерелеп, тиісті шешім қабылдаймыз дейді.
БАҚ-ғы кейбір ақпараттарға сүйенсек, медициналық сақтандыру қорының сарапшылары былтыр 3 млн-нан астам кемшілікті анықтаған. Бұл көрсеткіш 2021 жылы 1,9 млн болғанды. Оның ішінде 403,3 млн теңгеге 52 мыңнан астам жалған жазба жазылған. Жалған жазбалардың көбі Астана қаласында, Ақмола және Қызылорда облыстарында анықталды. Нормативтен тыс консультациялық-диагностикалық қызметтер бойынша жалған жазбалар жазған 297 медициналық ұйымның жұмысы белгілі болды. Оның ішінде мемлекеттік де, жекеменшік те ұйым бар.
