0:00 / 0:00
23 маусым - Қазақстан полициясы күніне орай қала әкімі Абат Шыныбеков елдің тыныштығы мен қоғам қауіпсіздігін сақтауда аянбай еңбек етіп жүрген жауапты мамандық иелерін құттықтады. Алдымен қызметтік міндеттерін атқару жолында қаза болған облыстық ішкі істер органы қызметкерлерінің рухына тағзым жасалып, гүл шоқтары қойылды. Салтанатты шарада қызметтерінде жақсы көрсеткіштерге қол жеткізген полицейлер марапатталды. Мерекеге орай Орал қаласы патрульдік полиция батальоны алаңында өткен жиында қалалық Полиция басқармасының жеке құрамы сап түзеді. Қала басшысы Абат Шыныбеков ҚР Тәуелсіздігінің 30 жылдығымен және кәсіби мерекемен құттықтап, азаматтарымыздың қауіпсіздігі мен бостандығын, қоғамдағы тіршіліктің жайлылығын қамтамасыз етуде қызмет атқарып жүрген полиция қызметкерлерінің еңбегі өлшеусіз екенін атады.Тәуелсіздік жылдарында ішкі істер органының мыңнан астам қызметкері қызметтік міндеттерін атқарудағы ерліктері, абыройлы еңбектері үшін мемлекеттік наградаларға ие болды. Бұл күнгі шараға ішкі істер органдарында қызмет ете жүріп, қылмыскерлермен күресте қаза болған полицейлердің отбасылары шақырылып, құрмет көрсетілді.Қалалық әкімдіктің қолдау көрсетуімен бүгінде шаһардағы адамдар көп жиналатын алаңдарда, әлеуметтік нысандар мен көңіл көтеру орындарында жалпы 452 бейне бақылау жүйесі орнатылған. Олар нақты уақыттағы жедел жағдайды бақылауға мүмкіндік береді. Бұдан бөлек 5 модульдік полиция бекеті бар. Кейінгі жылдары қала аумағында қылмыс көрсеткіштері азайған. Қылмыстардың ашылу деңгейі жоғары. Салтанатты шара жеке құрамның саптық шеруімен аяқталды.
