0:00 / 0:00
Нан қымбаттай ма? Бұл сұрақ соңғы күндері қоғамды алаңдатып отырған мәселенің бірі. Себебі, дүкен сөрелерінде нан бағасының өскенін көруге болады. Алайда, ауыл шаруашылық министрлігіндегілер Қазақстанда әлеуметтік нан бағасы көтерілмейді деп сендіреді. Ал ұн тапшылығы орын алады деген ақпаратты да жоққа шығарып отыр. Бұл туралы ауыл шаруашылығы министрлігінің өкілдері журналистермен өткен баспасөз маслихатында мәлімдеді.
Ас атасы-нанның да бағасы өсе бастады. Астықты ел -Қазақстан бүгінде әлемнің 40-тан аса еліне астық экспорттайды. Дей тұрғанмен, ішкі нарықта нан бағасына да қымбатшылықтың әсері тиіп отыр. Бұған дейін отандық диірменшілер астық тапшылығына байланысты жұмысын тоқтатуға мәжбүр екені туралы ақпарат тараған болатын. Бұл ел ішінде наның қымбаттауына әкеп соғады деген ойлар да айтылуда. Елорданың дүкен сөрелерінде 120 теңгенің наны 165-170 теңгеден сатылып жатыр. Алайда, бұл әлеуметтік нан емес, премиальды нанның, яғни багет, круассан және тағы басқаларының бағасы шикізат құнына қарай өзгеріп тұрады дейді ауыл шарушалыық министрлігі өкілдері. Дәл қазір Қазақстанда нан қымбаттамайды деп сендіреді олар. Яғни әлеуметтік нан.
Министрлік өкілдеріне сенсек, ішкі нарықта бидай немесе ұн тапшылығы жоқ. Қазақстанда 120 мың тоннаға жуық ұн бар. Оның 30 мың тоннасы тұрақтандыру қорларында. Бұл қор 3-4 айға жетеді деп отыр. Осылайша, ішкі нарық болсын, әлемдік нарық болсын, бидай мен ұн бағасы өссе, тұрақтандыру қорларында сақталған ұн ел ішінде арзан бағамен сатыла бермек. Дегенмен, министрлік Қазақстан астығы мен ұнын экспорттауға шектеу қоймақ. Бұл ішкі нарықтағы тапшылықты жою және ұн тартатын кәсіпорындарды жүктеу үшін қажет дейді вице-министр.
Сапаровтың айтуынша, ағымдағы жылдың 15 сәуір мен 15 маусым аралығында бидай мен ұн экспортына квоталарды енгізу туралы шешім қабылданды. Шектеу шарасына сәйкес, 1 миллион тоннадан артық бидай, 300 мың тоннадан артық ұн сыртқа шығарылмайды.
