0:00 / 0:00
Кез келген қаланың көркі сымдай тартылған көшелер, гүлзарлар мен субұрқақтар, сылдырап аққан арықтар екені анық. Орал қаласы бүгінде осындай мекенге айналып келеді. Ең бастысы, қаланы абаттандыру жөніндегі іргелі істер бүгінде қаланың шеткері аймақтарына қарай құлашын жая бастағаны сүйсіндірмей қоймайды. Өткен жылы гүлді аумақ 26 мың шаршы метрге жетсе, биыл тағы да үлкейетін болады.Оралдың өзге қалалармен салыстырғанда басты артықшылығы, әрі өзгешелігі- таза ауасы. Ал бұл артықшылыққа қол жеткізуге жасыл белдеудің молдығы айрықша ықпал етеді. Орал қаласын гүлдендіру бағытында биыл бюджеттен 600 млн. теңге бөлінген. Бұл қаражат тал-теректер мен гүлдер отырғызуға, қураған, апатты ағаштарды кесу секілді басқа да көгалдандыру жұмыстарына жұмсалмақ.Жыл сайын қала көшелері бойында, тынымбақтарда, қала аумағында орналасқан алаңдарда шырайгүл, бархотка, нарқайсар (вербена) секілді басқа да гүлдердің 30-40 түрі отырғызылады. Бұған дейін гүлдермен безендірілген түрлі бейнелер жасауға баса назар аударылған болса, биыл да сол үрдіс жалғасын тапқалы отыр. Сонымен қатар қызыл және ақ гүлдер көптеп отырғызылатын болады.Қаладағы көгалдандыру, гүл отырғызу жұмыстары бүгінгі таңда қарқын алған. Көп ұзамай сүйікті қаламыздың сұлу бейнесі дәл осы гүлдермен безендіріліп, қараған көзің жауын алатын болады. Ал абаттандыру қағидаларының бұзылуына жол берген жеке және заңды тұлғалар жауапкершілікке тартылады. Оларға ҚР Әкімшілік құқықбұзушылық туралы кодексінің 505-бабы бойынша айыппұл салынады.
