0:00 / 0:00

Облыс көлемінде 15-ші қыркүйектен 15-ші қараша аралығында емханаға тіркеу науқаны жалғасады. Бұл науқан міндетті әлеуметтік медициналық көмектің аясында жүзеге асуда. Сала мамандарының келтірген дерегіне сүйенсек, былтырғы жылы 5700-ден астам азамат өз құқығы бойынша емхананы таңдаған. 2019 жылдың бірінші қаңтарынан бастап, барлық азаматтар міндетті әлеуметтік медициналық сақтандыру аясында ем-дом шараларын алатын болады.

Сала мамандары емхана таңдаған азаматтарға мынандай кеңестерін айтып берді. Яғни, сіз таңдаған емхана үйіңізден 15-20 минуттық қашықтық жерде орналасуы керек екен. Науқастың жағдайы нашарлаған кезде дәрігер осы аралықтың ішінде үйіңізге барып, көмек көрсетуі абзал деседі. Сондай-ақ, міндетті әлеуметтік медициналық сақтандырудың аясында емханадағы кезекті азайту да көзделіп отыр. Мысалы, қазіргі таңда, әрбір учаскелік дәрігер 2000-ға жуық науқасты қабылдайды екен. Сала мамандары бұл цифраны 1700-ге дейін төмендетуді көздеп отыр. Тілшілермен болған баспасөз мәслихаты барысында облыс көлемінде 200-ге тарта дәрігердің тапшылығы айтылды.

Азаматтарға қаралып жүрген емханасы ұнамаса, емхананы ауыстыра алады. Емханаға ауысу үшін аяқтай емдеу нысанына барып, арнайы өтініш жазуға болады. Сондай-ақ, егов порталы арқылы электронды түрде арыз бере алатын мүмкіндікке ие.