0:00 / 0:00
«Уланов» шаруа қожалығының жылыжайы қаламызға көктем шыға егілетін гүлдерді өсіріп дайындап қойған. Мамыр айының басында қала көшелеріне отырғызылатын гүлдердің ішінде бір және көп жылдық көшеттер бар.Тал-теректер мен гүлдер негізінен, оралдықтар мен қала қонақтары жиі жүретін үлкен көшелер мен гүлзарларда отырғызылады. Тұңғыш Президент алаңы жаңадан салынған нысан болғандықтан, әрі оның аумағы көгалдандыруға мүмкіндік беретіндіктен, онда көгалдандыру бағытында түрлі іс-шаралар жүргізіледі. Зашаған, Круглоозерный кенттері тал-терек егуге ыңғайлы аумақ. Ал Деркөл мен Желаев кенттерінде бос орындар аз болғандықтан, бұл бағытта атқарылатын жұмыстар аз. Өткен жылы өңірдің топырағын жерсінетін көпжылдық ағаштар, терек, татар үйеңкісі, емен көшеттерін отырғызу басталған. Қараған, бөртегүл ағаштарын да егу қолға алынатын болады. Соңғы жылдары бұл жасыл желекті күтіп ұстау жұмыстарымен «Жайық таза қала» ЖШС айналысып келеді. Қазір гүлзарларға көктемгі екпелерді отырғызуға дайындық жұмыстары басталған. Жылыжайда көгалдандыру маусымына біржылдық және көпжылдық өсімдіктер, бұталар дайын. Техникаларға профилактикалық жұмыстар жүргізілген. Өткен жылдан бастап екі кәсіпорынмен үш жылдық келісімшарт жасалған. «Жасұлан Флора» ЖШС тал-тректерді өсірумен шұғылданса, «Уланов» ЖШС бір және көп жылдық гүл егумен айналысады. Биыл облыс орталығындағы 24 орында 12 мың шаршы метр аумаққа 240 мыңдай гүл отырғызылады деп жоспарланып отыр.
