0:00 / 0:00
"Аналарға мың алғыс!" Жер ананы бусандырған көктемнің алғашқы күнімен тұспа-тұс келген алғыс айту күнінде перзентханадан шыққалы отырған жас аналарға тарту жасалды. Орал қалалық көп бейінді ауруханасының жанындағы перзентханадан бүгін 11 ана нәрестелерін құшақтарына алып, шаңырақтарына оралғалы отыр екен. Ел демографиясын арттыруға үлес қосқан жандарға қала әкімдігі атынан құттықтау жасалып, ал ҚР-ның жаңа азаматтарына туу туралы куәліктері салтанаты түрде табысталды.
Құндақта жатқан бұл нәрестелер қыстың соңғы күнінде шыр етіп дүние есігін ашқандар. Көктемнің алғашқы күнінде сәбилерін бауырына алып, отбасына оралғалы отырған 11 ананың қуанышында шек жоқ. Себебі бұл күні олар ел демографиясын арттыруға қосып жатқан үлестері үшін ерекше алғысқа бөленді. Араларында егіз баланы дүниеге әкелген ана да бар. Оның ұлдарының салмағы 3 келі 400 грамм және 1 келі 900 грамм. Есімдерін Батырхан және Алихан деп қоймақшы.
1-наурыз күні қалалық аурухана перзетханасында екі нәресте туған. Қала әкімінің орынбасары аналарды қуаныштарымен құттықтап, алғысын жаудырды. Сонымен қатар, гүл мен бөбектерге арнап ойыншықтар сыйлап, ресми түрде туу туралы куәліктерін табыстады.
Аналар- тіршіліктің тірегі! Сол себепті аналар зор алғысқа лайықты. Жер-дүниеге жан берер көктеммен бірге ілесе келген алғыс айту күнінде әр адам өзіне жарық дүниені, тіршілікті сыйлаған аналарына да алғыс айтуды ұмытпауы керек. Бірлігі жарасқан ел болып, бөбектеріміз мен аналарымыз, тәуелсіз елдің ұрпағы алғысқа бөлене бергей деп тілейміз.
