Атырау қаласында билікті күшпен басып алуға дайындалды деген күдікпен 10 адам ұсталды. Арнайы операция 30 қазанда Ұлттық қауіпсіздік комитеті прокуратура органдарының үйлестіруімен жүргізген сотқа дейінгі тергеу аясында өткен. Тергеу нұсқасына сәйкес, күдіктілер Батыс Қазақстан өңірінде конституциялық құрылым негіздерін күшпен өзгертуге әрекеттенген. Оларға экстремистік топ құрды, оның қызметіне жетекшілік етті және қатысты, сондай-ақ терроризмді насихаттап, діни араздықты қоздырды деген айыптар тағылып отыр. Күдіктілердің тұрғылықты жерлерін тінту кезінде атыс қаруы, есірткі заттары, діни атрибутика, әдебиеттер мен өзге де заттай дәлелдер тәркіленген.