Түркиядағы зілзала салдарын жоюға қатысқан қазақстандық құтқарушылар елге оралды. Кеше түнде Түркияның Нурдагы қаласындағы жойқын жер сілкінісінің салдарын жоюға жұмылдырылған қазақстандық құтқарушылардың екінші эшелоны елге аман-есен оралды, деп хабарлайды Төтенше жағдайлар министрлігінің баспасөз қызметі. Түнде Төтенше жағдайлар министрлігінің құтқарушылары мен Апаттар медицинасы орталығының дәрігерлері бар борт Астана әуежайына қонды. Құтқарушыларымызды туғандары мен жос-жарандары, әріптестері қарсы алды.

Ақпанның 20-на қараған түні Астана әуежайына келіп қонған ұшақта қазақстандық құтқарушылар болды. Зілзала орын алған өңірден аман оралған оларды туған-туыс, дос-жаран, әріптестері қарсы алып, мәз-мәйрам болып жатты. Түркиядағы жойқын жер сілкінісінің салдарын жоюға қатысқан қазақстандық құтқарушылардың елге оралған екінші легі бұл. Баурылас түріктерге қолдау көрсетіп қайтқан құтқарушыларымызды ТЖ министрі Юрий Ильин мен Түркияның біздің елдегі елшісі Уфук Экиджи де келіп қарсы алып, өз халқының атынан алғысын айтып жатты. 40 мыңнан астам адамның өмірін қиған Түркиядағы зілзала салдарын жою барысында қазақстандық құтқарушылардың күшімен 7 адам құтқарылды. Қаза тапқан 88 адамның, оның ішінде 10 баланың денесі шығарылды. Министр Ильин құтқарушылардың барлығы марапатталатынын айтты. Ал іздеу-құтқару жұмыстарында тамаша нәтижелер көрсеткен иттердің де еңбегін елеп, марапаттады.

Түркиядағы жер сілкінісінен құлаған ғимараттардың астында қалған адамдарды құтқару оңай болмағаны сөзсіз. Бұл орайда құтқарушыларымыз қырағылық танытып, кәсіби жұмыс істеді. Түркияға барған бетте құтқару жұмыстарына кірісіп, күн сайын 16 сағат тынымсыз еңбек еткен.

ИСЛАМБЕК АМАНГЕЛДИНОВ – ҚҰТҚАРУШЫ ТОПТЫҢ ЖЕТЕКШІСІ «Түркияға барысымен бірден құтқару жұмыстарына кірістік. Біздің топ 7 қабатты құлаған тұрғын үйдің үйіндісінен құтқару жұмыстарын жүргізді. Жермен жексен болған.3 қабаты паркингке түсіп кеткен. Кезектесіп күніне 16 сағаттан құтқару жұмыстарын жүргіздік».

ТЖМ мәліметінше, апаттар медицинасы орталығының дәрігерлері де тәулік бойы зардап шеккендерге білікті медициналық көмек көрсетті. 200-ге жуық жергілікті тұрғындар мен құтқарушыларға, оның ішінде 30-ға жуық балаға медициналық жәрдем жасалды. Түркиядағы іздестіру-құтқару жұмыстарына Астана және Алматы қалаларынан, Ақмола және Қарағанды облыстарынан құтқарушылар қатысқан еді.