Үкімет инфляциямен күреске екі қолын сыбана кірісті. Бағасы шарықтап кеткен азық-түлік құнын қалай төмендетпек? Бұған министрлер кабинетінің өз жоспары бар. Бүгін өткен Үкіметтің онлайн  отырысында 2021 - 2024 жылдарға арналған инфляцияға қарсы әрекет ету қадамдары қаралып, тиісті құжат жобасы мақұлданды.

Пандемия кезінде халықтың әл-ауқаты төмендеді. Азық-түлік, күнделікті қажетті заттардың құны шарықтады. Қазір қазақстандықтардың айлап тапқан жалақысы қант-шайынан аспай қалды. Әлеуметтік маңызы бар азық-түлікке баға күн санап өсіп жатыр. Мемлекет басшысының Жолдауында елдің қамын қамту айтылғанды.  Президент Қасым-Жомарт Тоқаев Үкімет пен Ұлттық банкті инфляциямен күресте дәрменсіз деп сынады. Енді Асқар Маминнің кабинеті мен  Ұлттық банк басты міндетіміз– инфляцияны 4-6 пайыз деңгейіне қайтару деп отыр. Қазақстанда инфляция 8 айдың қорытындысы бойынша 8,7%-ды құрады.  Оның 50%-дан астамы азық-түлік тауарлары бағасының өсуіне тиесілі болып отыр.

Өз кезегінде Ұлттық банк инфляцияны тұрақтандыру  үшін  импорт пен экспорт тауарларын өндіруді сақтай отырып, ішкі нарықты жан-жақты толықтыру бастамаларын іске асыруды ұсынды.

Досаев бұл шаралар азық-түлік инфляциясын 2022 жылы 6%-ке дейін және 2023-2024 жылдары 5%-ке дейін төмендетуге мүмкіндік береді деп сендірді. Осылайша шарықтап кеткен инфляциямен күреске  екі қолын сыбана кіріскен үкімет  бағаны ұстап тұру үшін 2021 - 2024 жылдарға арналған инфляцияға қарсы әрекет ету  жобасын әзірлеп, жүзеге асыруды көздеп отыр.