Орал қаласындағы Гагарин көшесі 38 мекенжайында орналасқан екі қабатты тұрғын үйдің тұрғындары орнатылып жатқан қоршауларға көңілдері толмай отыр. Ол қоршауларды үйдің қасында орналасқан базар орнатуда. Сауда-саттық нысаны қоршауларымыз заңды орнатылуда,- дейді.

Бұл- Гагарин 38 мекенжайында орналасқан тұрғын үй. Аталмыш баспананың тұрғындарын терезенің алдында жаңадан орнатылып жатқан қоршау алаңдатып отыр. Қоршауды үйдің қасында орналасқан базар орнатуда. Тұрғындар сауда-саттық нысаны біздерге ештеңені ескертпей, рұқсат алған жоқ,- дейді. Сонымен қатар тұрғындар енді бұл қоршаудың кесірінен не жедел жәрдем көлігі не өрт сөндіруші машина келе алмайды деп алаңдайды.

Биыл жазда аталмыш нысанның иелері үйдің қасында орналасқан 6 соток жерді сатып алыпты. Сауда-саттық нысанының өкілдері қоршауларды заңды орнатып жатырмыз,- дейді. Олар құрылысты заңға сәйкес орындап жатқандығын және келер 3-4 жылда замануи ғимаратты салып беретіндігін алға тартып отыр.

Тұрғындарды толғандырып отырған қоршаулардың арақашықтығы туралы қалалық әкімдікке қарасты жер қатынастары бөлімінің мамандарына хабарласып, оқиғаның мән-жайын сұрап білген едік. Сала мамандары тұрғын үй мен орнатылатын қоршаудың арасында 3 метрдей арақашықтық сақталуы тиіс,- дейді.

Сауда нысаны заңнамада көрсетілген талаптардың баршасын орындауы шарт. Егер тұрғындар құзырлы мекемеге арыз-шағым түсірсе, бизнес субьектісінің қоршауды орнатудағы жұмысы тексеріледі. Нәтижесінде қателіктер анықталса, заңнамаға сәйкес бизнес субектісі жауапкершілікке тартылуы мүмкін.