0:00 / 0:00
Қазақ басшысының алып ел –АҚШ-қа сапарында американдық ірі компаниялардың басшыларымен кездесуі өтті. Қазақстан Президенті Қасым-Жомарт Тоқаев жұмыс сапармен Нью-Йоркте жүргенін еске салғымыз келеді. Бұл кездесуде IT cаласында адам капиталын көтеру және Қазақстанда технологиялық хаб құру мәселелері талқыланды.Сондай-ақ, білім беру, мемлекеттік қызметкерлердің кәсбилігін көтеру мәселелері де сөзге тиек етілді. Ақорданың хабарлауынша, Президент Тоқаев инвесторларды Қазақстанға шақырды. АҚШ-тың Қазақстан экономикасындағы негізгі инвесторлардың үштігіне кіретінін ескерсек, бұл кездесулер біздің ел үшін маңызды.
ҚАСЫМ-ЖОМАРТ ТОҚАЕВ – ҚР ПРЕЗИДЕНТІ «Менің командамның инвестиция тартудағы тәжірибесі мол. Бұл компанияларыңызға аймақтың ең жылдам дамып келе жатқан экономикаларының бірінде бизнес жүргізуді жеңілдетеді. Бүгінгі кездесу сауда-экономикалық және инвестициялық ынтымақтастықты ілгерілетуде, сондай-ақ Қазақстан мен АҚШ арасындағы стратегиялық серіктестікті одан әрі нығайтуда нақты қадам болады деп сенемін»
Мемлекет басшысы Boeing, Exxon Mobil, General Electrics, Wabtec, Microsoft сынды трансұлттық компаниялардың басшыларымен, сондай-ақ сарапшылық топтардың өкілдерімен де кездесті. Экономикалық зерттеулер институтының мәліметінше, 2005 жылдан бастап елімізге АҚШ-тан тартылған тікелей инвестицияның жалпы көлемі 48,8 млрд долларды құрайды. Бұл - Қазақстанға тартылған барлық шетелдік инвестициясының шамамен 13,5%-ы. Негізінде американдық компаниялар еліміздің тау-кен өндіру секторына басымдық жасайды. Бұл салаға құйылған шетел инвестициясының шамамен 30%-ы АҚШ-қа тиесілі. Ағымдағы жылдың 1 қаңтардағы жағдай бойынша, Қазақстанда 695 американдық компания ісін жүргізіп отыр. Биыл Қазақстан мен АҚШ арасындағы тауар айналымы 1,5 млрд долларды құрады, бұл өткен жылмен салыстырғанда 1,1 млрд долларға көп.