Батыс Қазақстан облысында жаппай вакцинациялау басталды. Күніне шамамен макималды жағдайда 3000-нан аса адам ауруға қарсы препаратты қабылдауда. Медициналық қызметкерлер мен мұғалімдер және құқық қорғау өкілдерінен бөлек кәсіпорын қызметкерлерімен облыстың тілшілері де ерікті түрде кеселге қарсы тұруға үлестерін қосуда.Бастапқыда екпеге күмәнмен қараған қарапайым халық жұқпалы аурудан аман қалудың ең тиімді жолы- вакцина қабылдау екеніне көз жеткізді. Өйткені ақыр аяғы ажалға жеткізетін бұл тажалдан күн сайын бақилық болғандар қарасы сейілер емес. Сол себепті ерікті түрде екпе салдыруға ниет танытқандар қатары артуда. Мәселен, «Серік» өндірістік жабдықтау кәсіпорны» қызметкерлерінің өтініші негізінде №1 қалалық емхана мамандары компанияға арнайы келіп, 20 адамға екпе салса, тілшілер де жаппай вакцинаны қабылдады.Дәрігер мен полицейлер секілді билік пен бұқараның арасындағы алтын көпірге айналған ақпарат саласының өкілдері алдымен ПЦР-тест тапсырды. Саулықты сақтауды көздеген шара санитарлық талапқа сай өтті.Осы орайда тұрғындарды көбірек қамту мақсатында егу кабинеттері демалыс күндері де жұмыс істейтін болды. Бүгінге дейін облыста барлығы 21 745 адам вакцина қабылдаған. Алдын ала мәліметке сүйенер болсақ, осы айда тағы да 35 мың доза вакцина өңірге жеткізілмек.