Отан қорғаушылар мерекесі қарсаңында Ұлттық Ұланның авиабазасы ашылды. Авиациялық базаның ашылуына қатысқан мемлекет басшысы бұл Ұлттық ұлан ғана емес, бүкіл әскеріміз үшін айтулы оқиға деді. Аталмыш аза күштік құрылымдардың әлеуетін едәуір арттыруға мүмкіндік бермек. Ұшқыштардың шұғыл әрекет етуіне жағдай жасайды. Мемлекет Қарулы Күштерді жабдықтап, әскери инфрақұрылымды дамыту мәселесін айрықша назарда ұстайды, – деді Қасым-Жомарт Тоқаев. Сондай-ақ Президент елде орын алған алапат тасқынға қарсы күресте сарбаздардың еңбегіне баға берді.

Президенттің айтуынша, Қазақстанның әскери қызметшілері БҰҰ аясындағы түрлі халықаралық миссияларға қатысып, бітімгерлік борыштарын табысты атқарып келеді. Биыл олар өз міндеттерін Голан жоталарында алғаш рет дербес орындауға кірісті. Бұл әскеріміздің дайындық деңгейінің жоғары екенін және еліміздің әлемдік аренадағы беделінің өсіп келе жатқанын анық көрсетеді деді ол.

Су жаңа авиабазаның ашылуы барысында Мемлекет басшысына Қарулы Күштердің, басқа да әскери құрамалардың ұшақтары мен тікұшақтарының, жауынгерлік және арнаулы техникаларының жаңа үлгілерімен танысты. Сонымен қатар Тоқаев авиабазадағы бірқатар инфрақұрылымдық нысанды аралап шықты. Одан әрі Президент әскери қалашықтың Даңқ залында болып, Құрметті қонақтар кітабына қолтаңба қалдырды. Ұлттық Ұлан Авиабазасының Астана әуе айлағында орналасуы жеке құрам мен техниканы қажет жеріне уақытылы жеткізуге мүмкіндік бермек. Сондай-ақ әуеден барлау жүргізу, зардап шеккендерді эвакуациялау кезінде Ұлттық ұланның бөлімшелеріне авиациялық қолдау көрсетеді.