23 наурыз күні Орал қаласының аумағында «Тазару» күніне орай ауқымды сенбіліктер өтті. Бұл шаралар «Наурызнама» тұжырымдамасы және республикалық «Таза Қазақстан» акциясы аясында ұйымдастырылды. Сенбіліктердің басты орындарының бірі «Агрореммаш» зауытының маңындағы «Халықтар достығы» саябағы болды. Сенбілікке Орал қаласының әкімі Мұрат Байменов пен қалалық әкімдіктің қарасты құрылымдық бөлімшелер қатысты.Сенбіліктердің негізгі мақсаты - қаланы таза ұстау, экологиялық жағдайды жақсарту және халықты бір-біріне жақындату. Әкімдік өкілдері атап өткендей, «Тазару» күні жастардың экологиялық акцияларға белсенді қатысуы өте маңызды. Олар болашақ ұрпақ алдындағы жауапкершіліктерін сезінеді және қаланы таза әрі әдемі етуге үлес қосады.Орал қаласының тазалық жұмыстарына 59 мыңнан астам тұрғын мен 1600-ге жуық мекеме қатысты. Олар 8 мыңнан астам аула, соның ішінде 1003 көпқабатты тұрғын үйдің аумақтарын және 7 мың жеке үйдің аумақтарын тазалады. Сонымен қатар 92 саябақ пен скверде абаттандыру жұмыстары жүргізілді. Қаланың көркеюіне қосқан үлесі ретінде 25 мыңнан астам ағаш көшеті отырғызылды.Тазалық жұмыстарының ішінде ерекше назар облыстың әлеуметтік нысандары мен тарихи-мәдени ескерткіштеріне аударылды. 489 әлеуметтік нысан мен 127 тарихи ескерткіштің аумақтары тазартылып, 2400-ден астам тротуар плитасы жөнделді. Сонымен қатар экологиялық іс-шараларды жүзеге асыру үшін 725 техника тартылып, 24 700 тонна қоқыс шығарылды.Заңсыз қоқыс тастау орындарымен күрес жұмыстары да белсенді жүргізілді. «Ғарыш сапары» АҚ анықтаған 77 үйіндінің 61-і жойылып, қалған 15 қоқыс үйіндісі жойылу үстінде.