Батыс Қазақстан облысы Полиция департаментінің Криминалдық полиция басқармасы қызметкерлері облыс орталығының бірнеше тұрғынын алдап, олардан 200 миллион теңгеден астам қаражат иемденген ер адамды ұстады. Ол азаматтарға жоқ бизнеске ақша салуды ұсынып, сенімге кірген.Ұсталған күдікті - Түркістан облысының 32 жастағы тұрғыны екені анықталды, әлеуметтік желі арқылы бір әйелмен танысып, өзін “iPhone” смартфондарын көтерме бағамен көршілес елдерге қайта сатып, пайда табатын кәсіпкер ретінде таныстырған. Алаяқ жәбірленуші азаматшаға осы бизнеске ақша салуды ұсынып, жоғары табысқа кенелтетініне сендірген. Сенімге кірген ер адамға әйел екі пәтерін сатып, одан түскен қаражат пен жеке жинақтарын берген. Нәтижесінде оның шығыны 77 миллион теңгеден асқан.Сонымен қатар, алаяқтың құрбаны болған әйелдің туыстары мен таныстары да “тиімді” инвестиция туралы ұсынысты қабылдап, қаражаттарын берген.Қазіргі таңда күдіктіге қатысты алты эпизод бойынша тергеу амалдары жүргізілуде. Жалпы шығын көлемі 200 миллион теңгеге жуық. Тергеу барысында оның ақшаны жеке қажеттіліктеріне жұмсағаны және букмекерлік кеңселерде ұттырып жібергені анықталды.Күдікті қамауға алынып, уақытша ұстау изоляторына қамалды.Полиция қызметкерлері азаматтарды қырағылық танытуға және қаржылық инвестицияларға қатысты мәселелерде бейтаныс адамдарға сенбеуге шақырады