Бір күнде облыс орталығында екі адам суға кетті. Тілсіз жаудың құрбаны болғандар туралы ақпарат таратқан құтқарушылар адамдар көп жағдайда ішімдік ішіп, суға түсу салдарынан осындай орны толмас қайғыға ұшырайтындарын жеткізді. Құтқарушылар қайтыс болғандардың дені алкогольді ішімдік ішіп, суға түскендер дейді. Күні кеше болған қайғылы оқиға да ұжым болып сейіл құру кезінде орын алыпты. Кешкі сағат 19:45-те Бәйтерек ауданы Жайық ауылы маңындағы ақылы жағажайда 1988 жылы туған әйел адам суға кетіп, қайтыс болған.Айта кеткен жөн, 1-ші маусымнан бастап аймақта суға түсу маусымы басталды. Барлығы 13 жағажайда шомылуға рұқсат берілсе, оның үшеуі Орал қаласының аумағында орналасқан. Демалыс күні болған екінші қайғылы жағдайда 1993 жылы туған ер азамат бақилық болды. Өкінішке орай марқұмның алкогольдік өнімдерді тұтынғаны анықталыпты. Осы орайда мамандар демалушылардың суға шомылуда бірқатар ережелерді сақтауы қажет екенін айтады.Ақылы жағажайларда тынығушыларға арналған арнайы киімдер мен қайықтар болған жағдайда арнайы белгіленген аумақта ғана суға түсуге рұқсат беріледі. Және құтқарушы мұнарасы да ұйымдастырылуы тиіс.