Алдағы екі жылда Орал қаласында жаңа алты мектеп салынады. Олардың үшеуі Зашаған кентінде, енді біреуі Жұлдыз ықшам ауданында болады. Ал, №31 мен 33 мектептерге қайта құрылыс жұмыстары жүргізіледі. Сондай-ақ, соңғы үш жылдың ішінде 8 балабақша мен үш мектеп күрделі жөндеуден өтіп, 1 білім ошағы қайтадан тұрғызылған еді. Биылғы жоспарға сәйкес, №19 мектептің күрделі жөнделіп жатыр. Өткен ғасырдың жетпісінші жылдары қабырғасы қаланған мектеп күні бүгінге дейін жөнделмеген еді. Құрылысшылар ғимаратты қыркүйекке дейін тапсырамыз деп отыр. Күрделі жөндеуден өтіп жатқан білім нысандары жайында толығырақ арна тілшісі сабақтап берсін.

Қазіргі таңда облыс орталығында орналасқан №19 мектеп күрделі жөндеуден өтіп жатыр. Жөндеу жұмыстары маусымда басталған, мердігер компанаия өкілдері жұмысты бірінші қыркүйекке дейін аяқтап береміз дейді. Өткен ғасырдың жетпісінші жылдары бой түзеген мектеп биылғы жылға дейін ешқандай күрделі жөндеу көрмепті. Қазіргі таңда, құрылыс жұмыстары 70 пайызға аяқталған көрінеді.

Құрылыс жұмыстарын тексеріп жүрген техникалық сарапшылар құрылыс жұмыстары жақсы жүріп жатыр деп баға берді. Алайда, жобалық-сметалық құжаттарында бірқатар олқылықтар бар деген пікірін ортаға салды.

Сондай-ақ, биылғы жылы жарты ғасырдан бері жөндеу көрмеген №24 ші "Солнышко" бала бақшасы да жөнделіп жатыр. Аталмыш нысан 170 балаға арналған. Жөндеу жұмыстарына дейін бала- бақша екі тілде балаларды тәрбиелеп келген. Бүгінде құрылысшылар ғимараттың шатырын жауып, қабырғаларын қаптап, бала ойнайтын едендер жылы болуы үшін бірқатар жұмыстарды атқарыпты. Құрылыс обьектісін аралаған қала әкімі мемлекеттен тапсырыс алғаннан кейін, жұмысшыларды еңбек биржасынан көптеп қызметке орналастыруды тапсырды.

Шаһарымыздың халқы өсуіне байланысты, жыл сайын мектеп табалдырығын 3000-3500 бала аттап, білім алуда. Бұл өз кезегінде мектептердегі орын жетіспеушілігіне алып келеді. Сол себепті келер 2019-2020 жылдары қала бойынша 6 су жаңа білім нысаны бой түземек. Қазіргі таңда, аталмыш мектептердің тиісті құжаттары дайындалып жатыр.