Осыдан бір апта бұрын әлеуметтік желіде бет-жүзін тұмшалап жауып алған төрт қыздың Қазақстан туын ұстап тұрған суреті тарады. Көк тудың жоғарғы бөлігінде діни символика мен арабша жазу болды. Кейін мәлім болғандай Атырау облысының полиция департаменті "Мемлекеттік рәмізді қорлау бабы бойынша қылмыстық іс қозғады. Қазір сотқа дейінгі тергеу амалдары жүргізіліп жатыр. Барлық күдікті анықталып, полицияға жеткізілген.Біреуін қамап, қалғандары айыппұлмен құтылған. Сондай-ақ, Wildberries интернет-дүкені арабша жазуы бар туды сатқаны мәлім болды. Бұл жағдай әлеуметтік желіде наразылық тудырды. Сауда алаңы арабша жазуы бар Қазақстан туларын тез арада сатылымнан алып тастағанды. Депутат Бапи туды қорлағандардың артында экстремистік күштер тұр дейді.
Оның айтуынша, мемлекеттік Туды қорлау – бүкіл халықты, тұтас мемлекетті қорлау.
ЕРМҰРАТ БАПИ – ҚР ПАРЛАМЕНТ МӘЖІЛІСІНІҢ ДЕПУТАТЫ "Бұл – жеке біреулердің діни көзқарасын білдіруі емес, қоғам тұрақтылығын, мемлекеттік тұтастықты бұзуға бағытталған нақақтан-нақақ жасалған арандату. Мұны ежелден қалыптасқан діни бірлік пен қоғамға жарықшақ салудың қаскөй әрекеті деп бағалау керек! Сонымен қатар, бұл оқиғаның арандатушылық мазмұны мен мемлекеттік тудың бетінде қолданылған символиканың сипаты оның алдын ала жоспарланғанын, әлдебір топтың нақақ ұйымдастырғанын көрсетеді. Бұған кім тапсырыс берді? Ұйымдастырушылардың мақсаты қандай? Бұл сұрақтарға құқық қорғау органдары нақты жауап беруге тиіс! Мұндай арандатушылықтың қайталануына жол бермеу үшін тергеу-тексеру шарасы жан-жақты жүргізілуі қажет".
Депутат Бапи, әкімшілік тұрғыдағы жазасын алған төрт қыздан бұрын, осы қылмыстық әрекетті ұйымдастырушылар жазаға тартылуы тиіс дейді. Ол Бас прокурордан туымызды қорлағандар заңға сәйкес,құқық қорғау органдарымен жіті тексеріліп, жалған туды дайындаушыларды, оны таратушыларды анықтап, мұндай қастандықтың жолын кесу үшін, ұйымдастырушыларға қатаң жаза қолдануды сұрады. Тиісті заңнамаға сәйкес, мемлекеттік рәміздерді қорлағандарға үш мың айлық есептiк көрсеткiшке дейінгі мөлшерде айыппұл салынады. Не тоғыз жүз сағатқа дейінгі мерзімге қоғамдық жұмыстарға тартылда, я болмаса екі жылға бас бостандығынан айырылады.
