Батыс Қазақстанның Қарауылтөбе ауылындағы өрт сөндіру бөлімінің бастығы белгісіз жағдайда қаза тапты. 26 наурыз күні сағат 08.30 шамасында ол ағасының тұрғын үйінің жазғы сарайының ішінде ес-түссіз жатқан жерінен табылып, жедел жәрдеммен Ақжайық аудандық ауруханасына жеткізілді. Ер адам ауыр жарақаттан аурухана төсегінде қайтыс болған. Ақан Нұрғалиевтің қазасы оның отбасы үшін шым-шытырық оқиға немесе шешуі жоқ жұмбақ секілді. Сол күні әріптестері өрт сөндіру бөлімінің бастығын түнгі сағат 11-лер шамасында жұмысқа шақырады. Туыстарының айтуынша, куәгерлер оның жұмыс орнының маңында бейтаныс адамдар жүргенін және олардың алкогольдік өнімдерді тұтынғанын байқаған. Ертесіне таңғы сағат 08:30 шамасында ол ағасының тұрғын үйінің жазғы сарайының ішінде ес-түссіз жатқан жерінен табылған. Туыстары марқұмның денесінің сау-тамдығы қалмай, аяусыз соққыға жығалған дейді. Аудандық аурухананың жансақтау бөлімінде ес жимай, қаза болған құтқарушының соңында үш баласы жетім қалып отыр.Дәрігерлер өрт сөндіру бөлімінің бастығының 8 қабырғасы сынып, ашық бас-ми жарақатын алғанын анықтаған. Аталмыш оқиғаға қатысты тергеу амалдары басталған. БҚО полиция департаментінің ресми өкілі Болатбек Белгібековтің мәлім еткеніндей оқиға Ақжайық ауданы Қарауылтөбе ауылында болды. 25 наурыз күні шамамен сағат 23.00-де 45 жастағы Н. мен 1992 жылғы М-ның арасында жанжал туындап, соңы төбелеске ұласқан. Егер де аталған оқиғаға қатысы барлардың кінәсі толықтай дәлелденсе, айыпты 12 жылға дейін бас бостандығынан айрылуы мүмкін.