Бөрлі ауданының орталығында Ұлы Отан соғысының ардагері Сағынбас Кушевті еске алуға арналған грек-рим күресінен республикалық турнир болып өтті. Республикалық додаға еліміздің 7 облысынан 14-16 жас аралығындағы 160 спортшы қатысып жатыр. Ұлы Отан соғысының ардагерін еске алуға арналған турнир 4 жылдан бері ұйымдастырылып келеді.

Ақсай қаласында ұйымдастырылатын грек-рим күресі дәстүрлі турнирге айналып үлгерді. Бұл жолы да ұйымдастырылған боз кілемнің белдесуіне еліміздің түпкір-түпкірінен келген спортшылардың қарасы қалың болды. Сайыстың ашылу салтанатына облыстық дене шынықтыру және спорт басқармасының басшысы мен аудандық әкімдіктің басшылары қатысты. Республикалық турнирде 14- пен 16 жастағы балуандар өнер көрсетіп, белдесті.
Еліміздің спортшыларымен бірге боз кілемде Ресейдің Орынборынан келген спортшылар да өнер көрсетті. Ресейлік балуандар қазақстандық спортшылармен белдесу қиынға соққандығын  атап өтті.
Осы байқауда бірінші орынды қанжығалаған спортшы, Қазақстанның спорт шебері кандидаттығына ие болады. Еліміздің ұлттық құрамасында өнер көрсетіп жүрген балуандар, азия мен әлем біріншіліктерінде еліміздің намысын қорғамақ. Аталмыш әлем біріншілігі Будапеште ұйымдастырылады деп күтілуде.