15-шы мамыр Қазақстан Республикасының халық қаһарманы, Ұлы Отан соғысының ардагері, екінші дүниежүзілік соғыста қазақтан шыққан жалғыз ұшқыш әйел Хиуаз Доспанованың туған күні. Батырдың туған күнінде Хиуаз Қайырқызына көше атауын беріп, майдангер оқыған мектепте арнайы мемориалды тақта ашылды.

Екінші дүниежүзілік соғыста қолына қару алып, жаумен арпалысқан батырлар көп. Солардың бірі қан майданда ержүректігімен көзге түскен, қазақтан шыққан жалғыз ұшқыш қыз- Хиуаз Доспанова. Ол 1942 жылы Жәнібек ауданынан сұрапыл соғысқа аттанады. 300 мәрте соғыс қимылдарына қатысып, 14 рет жараланған батыр қыздың ерлігі бүгінгі ұрпаққа үлгі. Ұшқыштың туған күнінде Ұлы Отан соғысының ардагерлері мен қала тұрғындары майдангердің ерлігін еске салып, рухына тағзым жасады.

Облыс орталығындағы бұрынғы Алмазов көшесіне Қазақстан Республикасының халық қаһарманы Хиуаз Доспанованың есімі берілді.

Мемориалды тақтаның ашылу салтанатына Ұлы Отан соғысының ардагерлері, зиялы қауым өкілдері мен қала тұрғындары қатысты. Жастығына қарамастан ел мен жердің азаттығы, бейбітшілік үшін күрескен батырлардың ерлігін өскелең ұрпаққа насихаттау бүгінгінің парызы.