Ұлттық экономика министрі Жұманғариннің айтуынша, қалтасы қалың азаматтарға салық жалпылай салынбайды. Яғни министрлік сән-салтанат салығын саралап салмақ. Қымбат алкоголь мен қымбат темекі бұйымдары сияқты тауарларға, бағасы күйіп тұрған автокөліктерге, зәулім үйлерге сараланған салық салмақшы.
СЕРІК ЖҰМАНҒАРИН – ҚР ПРЕМЬЕР-МИНИСТРДІҢ ОРЫНБАСАРЫ, ҰЛТТЫҚ ЭКОНОМИКА МИНИСТРІ «Министрлік жалпы байлыққа емес, бөлек-бөлек тауарларға сараланған салық салу жүйесін енгізуді жоспарлап отыр. Соның ішінде қымбат көліктер, жылжымайтын мүлік және тағы басқа заттар бар. Мәселен, жылжымайтын мүліктің жалпы құны 450 миллион теңгеден асса, онда, жаңылмасам, базалық ставка жылына 3 миллион болады, оған қоса, жалпы құнынан асатын соммадан тағы 2 процент алынады. Сосын көліктің бағасы 70 миллионнан артық болса, жоғары ставка қолданылады".
Қазақстанда байлық салығы салынады дегелі бірнеше жыл өтіп кетті. Бірақ үкімет қалталылардың қалтасын салықпен қақуға асықпай отыр. Осыдан үш жыл бұрын ұлттық экономика министрлігі сән-салатанат салығы 2024 жылы енгізілетін болады дегенді. Бірақ оның мөлшері жайында тіс жармағанды сол кездегі экс-министр Қуантыров. Тіпті байлық салығы қанша тұлғаға салынады деген сұраққа да нақты жауап ала алмағанбыз. Өздеріңіз көріп отырғандай 2025 жыл болды экономика министрлігі байлық салығына қатысты нақты шешім қабылдай алмай отыр.
СЕРІК ЖҰМАНҒАРИН – ҚР ПРЕМЬЕР-МИНИСТРДІҢ ОРЫНБАСАРЫ, ҰЛТТЫҚ ЭКОНОМИКА МИНИСТРІ «Байлық салығын жалпы емес, осылай сараланған жүйемен салған дұрыс деп ойлаймыз. Сонда әдістемелік тұрғыда ешкім шатаспайды. Ондай шараларды қолға алғанда нақты түсінік болуы қажет. Онсыз байлық салығы дұрыс салынбауы мүмкін»
Бай-бағландар салықтың құрбаны болып кетпесін деп алаңдап отырған шенеуніктер сараланған салық жүйесін дұрыс деп тауып отыр. Мемлекет басшысы біреше жыл бұрынғы Жолдауында байлық салығына орта тап адамдары ілігіп кетпеуі керек дегенді. Экономистер ең алыдмен байлықты есептеу әдістемесін енгізу керек дген пікірде. Мысалы, байлығы осынша миллионды құрайды деп есептелуі керек. Қазақстанда капитал мен жылжымайтын мүлікті бағалауды жүргізетін, сондай-ақ оларды жасыру әрекеттерінің алдын алатын арнайы орган құру қажет. Егер, байлық салығы енгзілсе, одан жалтаруға тырысатындар да табылады дейді сарапшылар.
