Оралда аулаларды кешенді абаттандыру жұмыстары басталды. Облыс орталығында үш жылға арналған «Аулаларды кешенді абаттандыру» бағдарламасы жүзеге асырылуда. Биылғы жылы 51 ауланы абаттындыру үшін жергілікті қазынадан 2 млрд. теңге бөлінген.«Аулаларды кешенді абаттандыру» бағдарламасы 2021-2023 жылдар аралығында жүзеге асырылады. Бағдарламаға қатысуға ниеттенген көпқабатты үй тұрғындары әкімдік сайтына өтініш қалдырады. Өткен жылдың қазанынан бастап ақпараттық хабарламалар жарияланып, тұрғындардың өтініштері жиналған. Жалпы 120-дай аула бойынша өтініш түсіпті. Солардың бірі Абай 51 мекенжайындағы көп қабатты үй ауласының жағдайына қатысты. Қазір тұрғындар өтініші бойынша жол жөнделуде.Әзірге бұл ауланың жолы толықтай жөнделіп, жарықтандырылады. Балалар ойын алаңы құрылысы биыл басталады деп жоспарланып отырғанымен келер жылға өтпелі кезеңге ауысуы мүмкін. Өйткені суық түсісімен құрылыс жұмыстары тоқтайды.Орал қаласында аулаларды абаттандыру 2007-2008 жылдары бастау алған болатын. Жалпы көпқабатты үйлер бойынша 500-ге жуық аула болса, олардың 350 абаттандырудан өткен. Алайда осыдан 10 жыл немесе одан да көп уақыт бұрын жаңартылған аулаларға қайтадан жөндеу жүргізу қажеттілігі туындап тұр. Келер жылға 19 ауланың абаттандыру жұмыстары бойныша жобалық-сметалық құжаттама дайындалған. "Тұрғын үй қатынастары туралы" жаңа заңға сәйкес, 2022 жылдың 1 шілдесінен бастап тұрғын үйді басқару жаңа формаға көшірілмек. Бұл - жай серіктестік және сол пәтерді басқару органы болып табылады. Сәйкесінше, ауланы абаттандыру және тұрғын үйдің жаңғыртуда да серіктестікті құрған тұрғын үйлерге басымдық береді.