Кеше Батыс Қазақстан облысында тосыннан соққан күшті жел бірнеше ғимараттың шатырын жұлып әкетті. Дүлей дауылдан түрлі дене жарақатын алған тұрғындар да бар. Көшелерде терек құлап, электр желілерін үзіп, көптеген көліктерге де залала келтірген. БҚО ТЖ департаменті бастығының орынбасары Ақылбек Ахметжанов бүгін Өңірлік коммуникациялар алаңында өткен баспасөз мәслихатында табиғи апаттан келген шығындарды есептеп, бүлінген нысадарды қалай қалыпқа келтіріп жатқандарын айтты. Қатты дауылдан Ақжайық, Жәнібек, Бәйтерек, Қазталов, тасқала аудандарында бірнеше әлеуметтік нысандар мен білім ошақтарының шатыры ұшып, төбелері төңкеріліп түскен. Облыстық денсаулық сақтау басқармасы екі адамның түрлі дене жарақаттарымен ауруханаға жатқызылғанын жеткізді. Олардың бірі Әбілқайыр хан даңғылы бойында автокөлік үстіне құлаған үлкен теректен жанарынан жарақат алса, 2003 жыл туылған бойжеткеннің басына шатыр сынығы құлаған.Қалада 105 жерде электр желілері үзілген. Кеше кешкілік 6 жөндеу бригадасы мен 2 апатты жою тобы түн ортасына дейін жұмыс жасап, бірқатар аудандарға жарықты қосқан. Алайда электромонтерлердің аздығы апатты қалпына келтіру жұмыстарын созып отыр. Сондықтан 2 күнге дейін кейбір аудандарға жарық берілмеуі мүмкін.28 м/с жеткен желдің екпіні салдарынан 5 тамызда облыс орталығында 105 үзілу тіркелді. Дәл қазір Орал қаласында 3 мың, қаланың кенттерінде 1 мың абонент жарықсыз отыр. Бұл әрине саяжай тұрғындарын есептемегенде. Жұмыста қиындықтар бар. Қызметкерлер аз. Бірақ қаладағы барлық мекемеден күш тартылуда. Шаһар тұрғындары «Жайық таза қала» мекемесіне ағаш құлағандығы жөнінде 60-тан астам шағым түсірген. Кеше жаяу жүргіншілер жолы мен газ құбырына құлаған 20 ағаш тазартылды. Қалғандарын бүгін «Жайық таза қала ЖШС -нің» 6 бригадасы жинауда. Сондай-ақ, кәріздік сорғыш станциясында электр энергиясының болмауына байланысты Арман, Көктем, Сарытау және Зашаған ықшам аудандарындағы су беру тоқтатылды. Сонымен қатар қатты желден Орал қаласындағы қатты тұрмыстық қалдықтар полигон мен оның аумағындағы алаңқай өртенді. Төтенше жағдай режимі жарияланды. Барлық апаттық және құтқару қызметтері күшейтілген режимде жұмыс жасауда, инфрақұрылым қалпына келтірілуде. Қатты желдің салдарынан сіздің жеке мүлкіңізге зардап келтірілген жағдайда аталған оқиғаны тіркеп «112» нөміріне хабарласуға болады.