Әскери билет, травматикалық қару және жүргізуші куәлігін алып беремін деген алаяқтарға алданып қалмаңыз. Осы бағыттағы хабарламалар әлеуметтік желілерде желдей есіп жүр. Сол себепті құқық қорғау қызметкерлері мен сыбайлас жемқорлыққа қарсы әрекет етуші орган өкілдері бүгін тұрғындарға түсіндіру шараларын жүргізді.Өйткені әлеуметтік желілерде арнайы белгіленген сомаға түрлі құжаттарды әзірлеп беремін деп, аты-жөнін жасырғандар жарнамасы көбейген. Олардың ішінде ең көп таралғаны жүргізуші куәлігі, травматикалық құралдары пайдалануға рұқсат қағазы және әскери міндетін өтеуге жарамсыздығын растайтын құжаттар болып отыр. Осы орайда сала мамандары тұрғындарды абай болуға шақырды.Айта кетейік, жоғарыда аталған құжаттарды халыққа қызмет көрсету орталықтары арқылы алуға болады. Ал жалған құжаттарды пайдаланғандар алаяқтық фактісі бойынша заң алдында жауап береді. «Ақжайық адалдық алаңы» кеңсесінің қызметкерлері желілерде көрсетілген байланыс телефондарына хабарласқанымен тілдесе алмаған.Айта кеткен жөн, осы мәселе бойынша облыста құқық бұзушылық тіркелмеген.