Батыс Қазақстан облысы - Қазақстанның жетекші аграрлық өңірлерінің бірі. Жалпы, өңірлік өнімдегі ауыл шаруашылығының үлесі шамамен 2,9%-ды құрайды. Мемлекет басшысы агроөнеркәсіп кешені алдына ауыл шаруашылығының жалпы өнімінің көлемін екі есеге арттыру міндетін қойды. Биыл көктемгі егіс және егін жинау жұмыстарын қаржыландыруға 700 млрд теңге бөлу жоспарланды. Президент тапсырмасымен науқанды қаржыландыру алдын ала басталды. Атап айтқанда, 2024 жылғы 1 қарашадан өтінімдерді қабылдау, 2024 жылғы 29 қарашадан бастап ақша берілуде. Қазіргі кезде жалпы сомасы 234,9 млрд теңгеге 3161 тауар өндіруші, оның ішінде Батыс Қазақстан облысы бойынша 4,9 млрд теңгеге 93 аграршы қаржыландырылды. Қаражат алты желі бойынша бөлінеді: Аграрлық несие корпорациясына, екінші деңгейлі банктерге, өңірлік инвестициялық орталықтарға, кредиттік серіктестіктерге, әлеуметтік-кәсіпкерлік корпорацияларға және Микроқаржы ұйымдарына тікелей несие беріледі, - деді өңірдің, еліміздің азық-түлік қауіпсіздігіне тікелей әсер ететін көктемгі егіс науқанын өткізуге қатысты сұрақтарды пысықтаған алқалы жиында Ауыл шаруашылығы вице-министрі Аманғали Бердалин. Былтыр іске қосылған лизинг бағдарламасы аясында облыс бойынша 8,1 млрд теңге сомасына 635 өтінім қаржыландырылды. Биыл жеңілдік лизингін жалғастыруға 200 млрд теңге бағытталады. Бұл еліміздегі машина-трактор паркінің 5 мыңнан астам ауыл шаруашылығы техникасын жаңартуға мүмкіндік береді. Ағымдағы жылы республикадағы жалпы егіс алқабы 23,7 млн гектарды құрайды, бұл өткен жылғы көлемнен 416,5 мың гектарға артық. Соның ішінде БҚО-дағы егіс алқабы - 612,7 мың гектар бұл былтырға карағанда 2,8 мың гектарға аз.Вице-министр агроөнеркәсіп кешені бойынша министрліктің саясаты мен негізгі даму бағыттары туралы толық ақпарат берді.Алқалы жиында өңір диқандарының көктемгі егіс жұмыстарына дайындығы туралы ауыл шаруашылығы басқармасының басшысы Жасұлан Халиуллин баян етті. Министрлік 2024-2028 жылдары ауыл шаруашылығындағы жалпы өнім көлемін екі есеге ұлғайту жөнінде арнайы жол картасын бекіткен. Соған орай 2025 жылы өңірде өсімдік шаруашылығына қатысты нақты жоспарлар жасалған. Егіс құрылымын әртараптандыру арқылы 613 мың гектарға ауыл шаруашылығы дақылдарын егу көзделген. Жиында үйірлі шегірткелерге қарсы химиялық өңдеу жүргізуге дайындық туралы ҚР АШМ Агроөнеркәсіптік кешеніндегі мемлекеттік инспекция комитеті өсімдіктер қорғау басқармасының бас сарапшысы Мұрат Нұғымаров, егіс жұмыстарын өткізудің оңтайлы мерзімдері мен ұсынылатын агротехникалық шаралар жайында «Орал ауыл шаруашылығы тәжірибе стансасы» ЖШС-ның басшысы Аспен Орынбаев, вегетациялық кезеңге ауа райы, болжамы жөнінде «Қазгидромет» мекемесі облыстық филиалының басшысы Тілеген Шапанов баяндады. Сонымен қатар ғалым-агроном Алдаберген Нұғыманов өз болжамдарын айтып, тәжірибе бөлісті. Облыс әкімінің орынбасары Қалияр Айтмұхамбетов жиналысты қорытындылап, егіс жоспарын орындау үшін қолда бар мүмкіндіктерді пайдалану қажеттігін еске салды.