0:00 / 0:00

Бүгін Парламент Мәжілісінде "Қазақстан мен Франция арасындағы қылмыстық істер бойынша өзара құқықтық көмек туралы шарт" ратификацияланды. Алайда, бұл келісім қазір Францияны паналап, елден қашып жүрген банкир Мұхтар Әблязовті елге қайтаруға мүмкіндік бермейді. Аталмыш құжат экстрадиция мен сотталған адамдарды беруді қарастырмайды. Ол тек құқықтық көмек көрсетуді көздейді. Бұл жауап алу, тінту сияқты тергеу амалдары, - деді бас прокурордың орынбасары Әсет Шындалиев тілшілердің сұрағына жауабында.

Мәжіліс мақұлдаған "Қазақстан мен Франция арасындағы қылмыстық істер бойынша өзара құқықтық көмек туралы шарт" құжат нені көздейді. Бас прокурордың орынбасары Әсет Шындалиевтің айтуынша, заң жобасында экстрадиция мен сотталған адамдарды беру қарастырылмаған. Ол тек құқықтық көмек көрсетуді, жауап алу, тінту сияқты тергеу амалдарын көздейді. Қазақстан 29 елмен дәл осындай шарт бекіткен.

Мәжіліс қабылдаған заң Қазақстанда қылмыстық жолмен табылған капиталды Франциядан қайтаруға мүмкіндік береді. Депутаттардың айтуынша елден заңсыз шығарылған капиталды қайтару жұмыстарында бұл құжаттың рөлі маңызды болмақ. Ерлан Сайыровтың айтуынша, бүгінде 150 миллиард доллар шетелге заңсыз кеткен. Ал кей ақпарат көздерінде шетел асқан заңсыз капиталдың көлемі 200 миллиард долларды құрайды.

Мәселе Франциямен арадағы шартқа байланысты болғандықтан, Қазақстаннан қашып, сол елде бас сауғалап жүрген банкир Мұхтар Әблязовты елге экстрадициялауға мүмкіндік бере ме деген сұрақ туады. Алайда, прокурор Қазақстан мен Франция арасындағы құқықтық көмек туралы шартты Мұхтар Әблязов үшін жасап жатқан жоқпыз дейді.

Еске сала кетейік, қазір Франция Мұхтар Әблязовқа саяси баспана беруден бас тартып отыр.