Орал қаласында жаңадан салынған денсаулық тынымбағында орнатылған банерді жыртып тастады. Ет комбинаты ауданындағы тынымбақ қала күніне орай ашылған болатын. Жергілікті тұрғындардың айтуынша, кешкілік уақытта осы жерге жеткіншектер жиналып, айналаны бүлдіріп, бұзақылық жасайтын көрінеді. Ал тұрғын үй коммуналдық шаруашылығы және тұрғын үй инспекциясы бөлімі тынымбақ маңындағы тәртіпті жергілікті полиция қызметі қадағалайтынын мәлімдеді.

"Денсаулық" тынымбағын медицина қауымдастығының бастамасымен абаттандырған болатын. Жоба құны 40 млн. теңге шамасында тұрады. Тынымбақтың қақ ортасында "Өмір ағашы" отырғызылған. Бірақ екі апта уақыт өтпей жатып, жаңадан ашылған нысанды қиратушылар табылды. Ілінген баннерді жыртып, жарық шамдарын сындырып, қоқыс қалдықтарын лақтырып, сұрықсыз күйге түсіріп жатыр. Биыл қалада 3 тынымбақ пайда болған. Құрылысты меценаттар қаржыландырған. Әсем орындар көпшілікті қуантқанымен оған қасақана залал келтіретіндерге тосқауыл болмай тұр.

"Сити центр" сауда ойын-сауық орталығы маңындағы тынымбақ құрылысына 60 млн. теңгедей қаражат жұмсалған болатын. Бұл жерде де жұмысшылар сынғалы тұрған жаттығу құрылғыларын жөндеп жатыр. Жергілікті тұрғындар қоғамдық орынға қасақана залал келтірушілерді жазалау ғана бұл келеңсіздікті жояр еді деп санайды. Нысандар басында тәртіпсіздік жасап, қоғамдық орынды бүлдірген ондаған бұзақы бейне камера көмегімен жазаға тартылған. Бұл жөнінде хабарлаған жергілікті полиция осы бағыттағы жұмыс жалғасып жатқанын атап өтті.