Оның инновациялық көлігі шаһар көшелерінде бірден көзге түсті. Сырттай велосипедке ұқсас, шағын көлікпен азамат әлемді шарлап шықпақ ниетте. Поль Бодари есімді француздыққа қаламыздың тазалығы мен көлік жолындағы жүргізушілердің тәртібі ұнапты. 3 ай ішінде ол Лионнан Қытайдың Гуанчжоу қаласына жетуді жоспарлап отыр. Веломобиль деп аталатын көлігі инновациялық технологиямен, күн панелі, батарея және аккумулятормен жабдықталған. Сондықтан мүлдем жанармай сатып алмайтын көрінеді. Турист саяхат кезінде көбіне арзан мейманханаларда тұрақтап немесе күркеде түнегенді жөна санайды. Арнайы бағыт-бағдар сілтеуші бағдарламаның көмегіне жүгініп, қалаған еліне баратын француздық өзі құрастырған көлікпен 100 күнде 12 мың шақырымды бағындыра алатынын айтады.
-"Адамдар мені көргенде күлімдеп, қонақжайлық көрсетіп жатыр. Көбі бірге суретке түсейікші дейді. Бәрі менің көлігіме қызығып, сұрақтарын қойғысы келеді. Мен табиғат аясында, экологиялық таза көлікпен саяхат жасап, ел-жер көргенді ұнатамын. Орал маған ұнады",-деді Поль Бодари сұхбат кезінде.
