Президент Тоқаев 2022 жылды балалар жылы деп бекітті. Осыған байланысты елімізде балаларға арналған шаралардың да саны артпақ. Алайда іс-шарадан бөлек бүлдіршіндердің бос уақытын қалай ұйымдастыруға болады деген сауал күн тәртібінен түспейді. Қазіргі таңда Орал қаласында 55 мыңнан астам оқушы бар. Оларды жан-жақты тұлға қылып дамытуда үйірмелер жұмысының маңызды зор.

Орал қаласында 55 мыңнан астам оқушы білім алады. Олардың бос уақытын ұйымдастыру үшін мектеп жанынан, мектептен тыс орталықтар жұмыс істейді. Қазіргі таңда қалалық білім беру ұйымдарына қарасты қосымша білім беру мекемелерінде 14 мыңнан астам оқушысы тәлім-тәрбие алуда. Соның бірі-Зашаған кентінде орналасқан "Шабыт" орталығы. Аталмыш орталық жаңа мекенжайға өткен жылы көшкен еді. Бүгінде 3 бағыт бойынша жұмыстанады. Мамандар болашақта техникалық мамандықтарға деген сұранысты арттыру үшін заманауи үйірмелер ашуды жоспарлап отыр.

Бұл-8 жасар Мадина. Ол "Шабыт" орталығы жанынан құрылған сөз өнері үйірмесіне қатысады. 4 айдың ішінде қазақ тілі бойынша білімін толықтырып, түрлі тақырыпта шығарма мен эссе жазып үлгерген.

Мектептен тыс орталықтардан өзге облыс орталығында балалардың бос уақытын ұйымдастыратын аула клубтары жұмыс жасайды. Осы орталықтар да оқушыларды жан-жақты тәрбиелеуге атсалысып келеді. Қазіргі таңда Орал қаласында 22 аула клубы бар. Клубтарда 2300-ден астам бала 104 үйірмеге қатысады.

Тұрғын үйлердің жанынан ашылған аула клубтарына 7 жастан бастап, 17 жасқа дейін балаларды қабылдайды.