Абзал Жиынбаев есімді шаруа 100 бас қазақтың ақбас сиырын жаятын жер таппай дал. Ол өз ісін 2018 жылы бастапты. Қазіргі таңда асыл тұқымды мал басын көбейтумен айналысады. Алайда шаруа бірнеше жылдан бері жайылым жер ала алмай жүр.

Абзал Жиынбаев 2018 жылдан бастап ірі қара мал өсірумен айналысады. Ол қазіргі таңда 100 қазақтың ақ бас сиырын өсіріп отыр. Алайда шаруа өсірген малын жаятын жер таппай дал. Жазғытұрым зеңгібаба төлін Круглозерный кентінің жайылым жерлерінде жаяды. Ал қыста үйде қамайды. Шаруа жер алу үшін екі рет конкурсқа қатысады. Алайда жеңіліп қалыпты. Осы жайылымның жоқтығынан биыл мал басы үшін төленетін субсидиядан қағылып отыр. Жердің жоқтығы мал басын көбейтуге де кедергі жасайды. Қыста малын қорада ұстайтын шаруа от тұтанып, шөп жанса, ауылдықтарға залал тиеді ме деп қорқады.

Кәсіпкерді толғандырған мәселемен шаһар басшысының орынбасарына жолықтық. Атқамінер жайылым жерлері конкурс негізінде берілетінін айтады. Конкурс төрт айда бір рет ұйымдастырылады екен.

Жалпы облыс бойынша қазақтың ақ бас сиырын өсіретін 9800 астам шаруашылық бар. Шаруалар 77 мың бас асыл тұқымды түлікті өсіріп отыр. Оның 59 мыңнан астамы қазақтың ақ бас сиыры.