Сенбі күні Оралда тоғыз қабатты үйдің төбесінен 40 жастағы ер адам құлап кетті. Бұл туралы БҚО ПД баспасөз қызметі мәлімдеді.Оқиға 21-ші тамыз күні сағат 09.12-де Құрманғазы көшесі 150-мекенжайында орналасқан 9 қабатты үйде болды. Құрылыс жұмыстарын жүргізу кезінде төбеден 1981 жылғы ер адам құлап кетіп, оқиға орнында мерт болды. Қазіргі кезде жағдайдың  жай-жапсары анықталу үстінде. Батыс Қазақстан облысының еңбек инспекциясы бойынша басқармасы мамандарының айтуынша жыл басынан бері қызмет бабында 5 адам қайтыс болыпты. Яғни қызмет бабында қайтыс болғандар жалдамалы жұмысшылар болып табылады. Олармен жұмыс беруші компания арасында ешқандай келісімшарт жасалмаған. Сәйкесінше қауіпсіздік шаралары сақталмайды. Инспекторлар көбіне құрылыс саласында жазатайым жағдайлардың тіркелетінін жасырмады. Ал ПД оқиғаны растап мәлімдеме жасады. Бұл үйде мемлекеттік бағдарлама бойынша шатыр жөндеу жұмыстары жүргізілуде. Оған бөлінген қаражаттың көлемі 23 млн теңгені құрайды.