Орал қаласында фтизиопульмонологиялық орталығында ашық есік күні өтті. Кез-келген тұрғын МӘМС жүйесіне тіркелмегеніне қарамастан медициналық ұйымға қарала алатын мүмкіндікке ие. Күні бүгінге дейін ашық есік күндері арқылы 90-нан астам адам дәрігердің қабылдауында болған. Осындай тексеріс кезінде 4 адамнан жұқпалы індет анықталыпты.

Соңғы бес жылда БҚО-да туберкулезге шалдыққан жандардың саны азайыпты. Өткен жылғы тоғыз аймен салыстырсақ аурушаңдық көрсеткіші 3,5 пайызға төмендеген. Қазіргі таңда ауруханада 90-ға жуық науқас ем-дом қабылдап жатыр.

Дәрігерлерді сырқатты тез анықтайтын құрал-жабдық болғанымен медициналық ұйымдарға сақтандырылмаған азаматтардың бармауы алаңдатып отыр. Сол себепті облыс орталығында ашық есік күні ұйымдастырылады. Осы шара арқылы 92 тұрғын тексерістен өтіпті. Соның нәтижесінде 4 адамнан сырқат анықталған.

Егер 2 аптадан артық жөтелсеңіз, тершеңдік пайда болып, салмақ тастасаңыз дәрігердің қабылдауына барғаныңыз абзал.

Коронавирус пандемиясы басталғалы өзге жұқпалы аурулар туралы аз айтылып, дерт көрсеткіштері де жаман індет тасасында қалғандай. Бірақ басқа жұқпалы ауруларды жұқтырып, төсек тартып сырқаттанған жандар аз емес екен. Биыл 103 батысқазақстандық туберкулезге шалдығып, ем-домын қабылдап жатыр. Мамандар осы жылы өзге жылдармен салыстырғанда 8,3 пайызға науқастардың саны кемігенін айтады. Балалардың арасында да жұқпалы дертті жұқтырғандар азайыпты. Санитарлық дәрігерлер бұл орайда уақытылы медициналық тексерістен өтіп, балаларға манту егудің маңызы зор болды,- дейді.

Туберкулезден бөлек жұқпалы қызылша да қоғамға қауіп төндіреді. Биыл абырой болғанда аталмыш қауіпті жұқпалы ауру жан баласынан анықталмаған.

Мамандар қызылшаның эпидемиясын болдырмас үшін бір ауыздан вакцина қабылдау қажетін
алға тартады. Осы індетке қарсы екпе алғаш баланың бір жасында, кейін алты жасында салынады. Бұл екпе жиырма жылға дейін қызылшаға қарсы иммунитет қалыптастырады екен.

Сурет https://kazmedic.org/ сайтынан жүктелді