Сырым ауданына қарасты Жосалы ауылдық округінің оқушылары тозығы жетіп, шатырынан су сорғалаған мектепте білім алуға мәжбүр. Білім беру ошағы 1988 жылы пайдалануға беріліпті. Ал мектепті жылытатын жылу құбырлар әбден ескіріп, шіріп тұр,- дейді жауаптылар. Тіпті өткен оқу жылында оқушылар спорт зал мен мәжіліс залына мүлдем кірмеген.

Облыс орталығынан 200 шақырым шалғай орналасқан Сырым ауданына қарасты Жосалы ауылының шешімін таппай келе жатқан мәселесі аз емес. Солардың бірі-тозығы жеткен мектеп. Бүгінгі таңда осы оқу ордасында 100 астам бала тәлім алады. Алайда, білім ошағы әбден ескіріпті. Ғимараттың шатырынан су кетеді. Тіпті, педагогтер биыл көктем мен күзде спорт зал мен мәжіліс залды жауып тастауға мәжүр болған. Ата-аналар сыз мектепте оқитын балалардың денсаулығына алаңдайды.

Ғимарат 1988 жылы пайдалануға беріліпті. Содан бері оқу ошағы күрделі жөндеу көрмеген. Жауаптылар көктемде су кеткен спорт залдың шатырына қара қағаз төсеп қойдық. Өткен жауын-шашыннан кейін ғимаратқа су кірмеді,- дейді.

Қазіргі таңда Сырым ауданының білім беру бөлімі мектепке күрделі жөндеу жасау үшін жобалық сметалық құжат дайындап жатыр. Бұрындары осы құжат жасақталыпты. Бірақ, қаражаттың бөлінбеуіне байланысты балалар шатырынан су кететін ғимаратта әлі күнге дейін оқуға мәжбүр. Ауылдық ағайынның облыс пен өзге ауылдарға үдере көшпесі үшін барлық заманауи талаптарға сай жабдықталған, ең бастысы балалардың саулығына зиян келтірмейтін мектеп жұмыс жасауы тиіс,-дейді тұрғындар.

Аудан мен ауылды жалғайтын тас жолы күрделі жөндеу көрмеген Жосалының тұрғындары ауыз суға да жарымай отыр. 2017 жылы ауылдық округке "Ақбұлақ" мемлекеттік бағдарламасы арқылы ауыз су кірген. Алайда ұңғымалардағы насос істен шығып, құбырлар жиі жарылады екен. Жол мен ауыз судан тарығып отырған бұқара жарықсыз да жан бағып келеді. Ал, мамандар ауылдағы тозығы жеткен бағаналарды толықтай жаңалау үшін 12 жыл уақыт керек,- дейді.

Жолдың машақатын тартқан Жосалы ауылдық округінің тұрғындары ауыз судан да тарығып отыр. Ауылдық округтің орталығы Қоңыр ауылы Сырым ауданына қарасты 7 елді-мекенді ауыз сумен қамтиды. Елдімекенге 2017 жылы "Ақбұлақ" мемлекеттік бағдарламасы арқылы суды үйге кіргізіпті. Бұған дейін тұрғындар 2005 жылдары салынған ұңғыманың суын колонкалар арқылы ішіп келген. Алайда өткен қыс пен көктемде әлгі ұңғыманың насосы істен шығады. Талдау нәтижесінде ұңғыма суының азайғанын анықталады. Кейін 2017 жылы қазылған ұңғыманы пайдалауға шешім қабылданыпты. Бірақ шешім де ауыз судан тарыққан ағайынға қуаныш сыйламады. Ұңғымамен су резервуарын жалғайтын құбыр жиі жарылып, азаматтар апталап ауыз судан таршылық көрген.

Жауаптылар қазіргі таңда диаметрді 63 саниметрді құрайтын құбырды алмастыру үшін жобалық-сметалық құжат дайындалып жатқанын айтады. 8 шақырымдай құбырды ауыстыру үшін 70 млн теңгедей қаражат керек екен.

Суы мен жолы жоқ Жосалылықтар жарықтан да жиі ажырап қалады. Бір үйі жарығы сөнсе, бүкіл ауыл электр энергиясыз отырады. Ауылдық ағайын тіпті жаздыкүні жарықсыз күнелтеміз деп шағымданып отыр. Ал, елдімекендегі трансформаторлардың тиісті қоршауы жоқ. Ауыл ішінде тозығы жетіп, құлайын деп әзер тұрған бағанадан көз сүрінеді.

Атқамінерлер ауылдағы барлық бағананы алмастыру үшін 12 жылдай уақыт керек деседі.

Жосалыда қордаланған проблема көп. Алайда, тұрғындар осы өзекті мәселелер тезірек шешімін тапса,-дейді.

Сурет https://baq.kz/ сайтынан жүктелді

Сырым ауданына қарасты Жосалы ауылдық округінің тұрғындары жолдың кесірінен зардап шегіп отыр. Қаладан 200 шақырым қашықтықта орналасқан Жосалының тұрғындары көктем мен күзде езілген балшыққа батса, жазда шаңнан көз ашпайды. Ал қыста бораннан кейін айлап қатынастан қағылады.

Жол азабын жүрген білер. Сырым ауданына қарасты Жосалы ауылдық округінің тұрғындары жолсыздықтың кесірінен зардап шегуде. Жосалылықтар 31 шақырым тас жолдың қанша жыл өтсе де жөнделмей келе жатқанына наразы.

Мына бейнекадрларды ауыл тұрғындары биыл көктемде түсіріпті. Ал бұл қыста түсірілген бейнежазба.

Қанша әкім ауысса да жолдың мәселесі бір шешімін таппай келеді. Тұрғындар 30 жылда жөнделмеген жолдарын жөндеуді талап етеді.

Округ тұрғындарын толғандырған мәселе қашан шешіледі деп аудан әкімдігіне бас сұқтық. Аудан басшысы орнында болмай шықты. Атқамінер өзге ауылдық округтерді аралауға шығып кетіпті-мыс. Ал, жолға жауаптылар болса, Жосалы ауылдық округінің тас жолын жөндеу үшін жобалық-сметалық құжатты тек 2024 жылы жасау жоспарда бар екенін жеткізді. Құжат болса үш жылға жарамды. Атқамінерлер ауданға жол салу үшін облыстық бюджеттен жеткілікті деңгейде қаражат бөлінбейді,- деп хабарлады.

Шенеуніктерден жолдың уақытылы тазаланбауына да не себеп деп сұрадық. Жауын жауса балшықтан тазартылмай, қары уақытылы аршылмайтын тас жолды тазарту үшін 4 техникасы бар мердігер тендерді ұтып алған. Компанияға 38 елдімекеннің жолын тазалап, күтіп ұстау үшін бюджеттен 35 млн теңге бөлініпті.

Қысқа жіп күрмеуге келмейді. Жауаптылар жол салуда қаржы тапшы деп ақталады. Ауылдық жерде түтінін түтетіп, бала-шағасын өсіріп, ата қоныста күнелтіп отырған бұқараның арман-тілегі бір. Өмірі жөндеу көрмеген тас жолға асфальт салу. Президент Тоқаевтың еститін үкіметі Оралдан жырақта отырған Жосалының тұрғындарының уәжіне құлақ асады деп үміттенейік.