Еліміздегі Жоғарғы оқу орындарында қауіпсіздік шарасы сақталмаған. Осыған көз жеткізу үшін студенттердің бастамашыл тобы Нұр-Сұлтан қаласындағы университеттерді аралап, олардың күзет сапасын зерттеп көрген еді. Алайда,студенттер бас сұққан 12 Жоғарғы оқу орнының 10-на емін-еркін кіріп шыққан. Тіпті құжат та талап етпеген. Сенатор Ақылбек Күрішбаевтің айтуынша, бұл оқу орындарында қауіпсіздіктің сақталмайтынын білдіреді. Депутат «осы мәселені қолға алу үшін, міндетті түрде жарылыс болуы керек пе»- деп ашуланды. Сенатор үкіметке жолдаған сауалында осы проблемаға көңіл аударуды талап етті.
Сенаторлар ішкі істер және білім министрлеріне жолдаған депутаттық сауалында жоғарғы оқу орындарындағы қауіпсіздік мәселесін көтерді. Ақылбек Күрішбаев Ресейдің Қазан және Пермь қалаларында болған қанды оқиғалады еске алып, білім беру ұйымдарында қауіпсіздік мәселесін тезірек қолға алу керек дейді. Өздеріңізге мәлім, Қазандағы мектепте орын алған қайғылы жағдайдан соң, біздің құзырлы органдар орта білім беру мекемелеріндегі қауіпсіздік мәселесін қолға алғанды. Барлық мектептерді бейнебақылаумен, дабыл нүктесімен қамту, сапалды күзет қызметін енгізу айтылғанды. Әзірге мектептердің бәрінде бірдей қаруланған күзетті көріп тұрған жоқпыз. Енді сенаторлар Жоғарғы оқу орындарында да күзетті күшейту керек деп отыр. Қазақстанда заң бойынша күзетке арнайы лицензиясы бар фирмалар ғана тартылады. Оларды конкурс негізінде таңдайды. Ал тендер кезінде ең төмен баға ұсынған заңды тұлғалар жеңіске жетіп жатады. Бұдан күзет қызметкерлерінің жалақысы төмен болатыны сөзсіз . Сапалы күзетті жалдау үшін, олардың жалақысын екі есеге өсіру керек дейді сенатор.

Өздеріңізге белгілі, жалақының төмендігінен күзет қызметінде, көбінесе зейнеткерлер немесе егде жастағы адамдар жұмыс істейді. Олардың көп жағдайда рациясы, қаруы жоқ. Тәртіп бұзған адамдарды ұстауға шамасы да жетпейді. Кейбір университеттерде күзетте штаттық қызметкерлер яғни вахтерлар отыр. Олардың бәрі арнайы лицензия алмаған

Сенатор «осы проблеманы шешу үшін, міндетті түрде қандай да бір жағдай орын алмаса, қозғалмайды»- деп ашуланды.

Күрішбаев бастаған бір топ депутат үкіметтен осы проблемаға көңіл аударуды талап етті. Ал тиісті заңға өзгеріс енгізіп, күзет қызметін ретке келтірдік деп есеп берген құзырлы министрліктер іс жүзінде мәселені түбегейлі шешпей отыр дейді сенаторлар.