Заңсыз иеленген жерлерді қайтару мәселесімен етене айналысып жүрген депутат Базарбектің келтірген деректері көңіл қоншытпайды. Мәжілісмен республикалық жер комиссиясы мен оның инспекторларына жан-жақты заңсыз қысым көрсетілуде. Бұл жерлерді қайтару жұмысына кедергі болып отыр дейді. Осы орайда Бақытжан Базарбек вице-премьер Нұрлан Байбазаровтың кәсіпкерлерден түскен арыз өтінішінен кейін негізсіз хаттамалық шешім шығарғанын айтады. Статистикаға көз жүгіртсек, жалпы көлемі 55 мың гектар аумақтағы 72 жер бойынша жер иелері инспекторлардың заңды талабын орындамады.
Жалпы көлемі 47 мың гектар болатын 263 жер бойынша материалдар сотқа жіберілді, ал 20 мың гектар болатын 136 жер бойынша іс сотта қаралып жатыр дейді депутат.

Сондай-ақ, «Жер аманаты» жер комиссиясы Жамбыл, Павлодар және Батыс Қазақстан облыстарында орын алған жағдайларды тізіп шықты. Мысалы, Тараз қаласындағы көп қабатты тұрғын үйлердің ортақ кондоминиуміне кіретін аула жерлерін ірі кәсіпкерлерге құрылыс жүргізуге заңсыз берілген. Пауладар өңірінде 95 шаруа қожалығына берілген жалпы көлемі 53 мың гектар ауыл шаруашылық жерлердің халықтың мал бағатын жерлердің қатарынан берілген. Ал БҚО мен Орал қаласы бойынша жағдай тіпті ушығып отыр. Жергілікті билік комиссиядан заңсыз фактілерді жасыруға барынша тырысқан. Сондай-ақ, депутат экс-президенттің күйеубаласы Құлыбаевтың да аты аталған жерлерге қатысы дау бар дейді.

БАҚЫТЖАН БАЗАРБЕК – ҚР ПАРЛАМЕНТ МӘЖІЛІСІНІҢ ДЕПУТАТЫ «Әл-Фараби атындағы Қазақ Ұлттық университетінің жерлерін қайтрауға қатысты аты-шулы іс бойынша бизнес-орталық салатын жерінен сот шешімімен айрылып қалған Тимур Құлыбаевтың фирмасы Алматы қаласының әкімдігінен 34 млрд теңге төлеуді талап еткен.Яғни сотта жеңіліп қалған компания өзінің құрылысқа заңсыз салған қаражатын әкімдіктен шығарып алмақшы»

Депутат Базарбектің айтуынша, мұндай мысалдар жер телімдерін заңсыз таратқан әкімдіктердің бәрінде орын алатынына күмән жоқ. Осыған байланысты мәжілісмен Бас прокурордан заңсыз иеленген жерлерді қайтару жұмысына кедергі жасап отырған мемлекеттік органдардың жұмысына құқықтық баға беруді сұрады.

Жер кімдікі? Бүгін өткен Парламент мәжілісінің жалпы отырысында депутаттарды мазалаған басты сұрақ осы болды. Мәжілісмендер қай өңірге бармасаң да, жердің бәрін әкімдер басып алған деп ашуланды. Ауыл шаруашылық министрін жер иелеріне қатысты нақты мәлімет бермей отыр деп сынаса, министр Қарашөкеев депутаттардың бұл пікірін қабылдамаймын деп ашуланды. Мәжілісте «ҚР Әкімшілік құқық бұзушылық туралы кодексіне жерлердің пайдаланылуы мен қорғалуын мемлекеттік бақылау мәселелері бойынша өзгерістер мен толықтыру енгізу туралы» заң жобасы бірінші оқылымда талқыланып, мақұлданған еді. Заң жобасының мақсаты - жер қатынастары саласында азаматтарға қызмет көрсету кезінде және Әкімшілік құқық бұзушылық туралы кодексінің нормаларын салалық заңнамаға сәйкес келтіру кезінде жергілікті атқарушы органдардың лауазымды адамдарының жауапкершілігін күшейту.

Ауыл халқы мал өсіріп жан бағады. Алайда, соңғы отыз жылда жайылым, құнарлы жерлер ұстағанның қолында, тістегеннің аузында кеткен.Ауылда отырып, малын жаятын жеп таппаған халықтың мұңын кім есереді? Президенттің арнайы тапсырмасы да бар. Заңсыз иеленген немесе игерілмей жатқан жерлерді мемлекетке қайтару жүріп жатыр. Ауыл шаруашылық министрінің айтуынша, 5 млн гектар жер мыңдаған компанияның қолында. Алайда, министр Ербол Қарашөкеев жерді иемденіп алған латифундистердің атын атап, түсін түстемеді. Биыл 5,2 миллион гектар жерді қайтардық деген ақпаратпен шектелді. Бірақ депутаттар министрдің бұл жауабына сенбейді. Қай облысқа бармасаң да, жердің бәрін әкімдер басып алған деп ашуланды мәжілісмен Дүйсенбинов. Ол министрден мыңдаған гектар жері бар әкім-қаралардың аты-жөнін халыққа жария етуді талап етті.

Ауыл шаруашылығы министрі болса депутаттың сынын орынсыз деп атады. Ол жаңа жылдан бастап қазақстандықтар Интерактивті картадан мемлекетке қайтарылған 2 миллион гектар жерді көре алатынын айтты.

Әріптесі мен министрдің арасындағы теке-тіреске депутат Перуашев араласты.

Не керек, депутаттардың сынына бой бермеген министр де, оған шүйліккен мәжілісмендер өз пікірінде қала берді. Ал «Әкімшілік құқық бұзушылық туралы кодексіне жерлердің пайдаланылуы мен қорғалуын мемлекеттік бақылау мәселелері бойынша өзгерістер мен толықтыру енгізу туралы» заң жобасы бірінші оқылымда мақұлданып кетті. Заң жобасымен жерді пайдалану мен оны қорғау, жер қатынастарын реттейтін органдардың жауапкершілігін күшейту қолға алынбақ.