Биыл Ұлы Отан соғысының жеңіспен аяқталғанына 75 жыл. Бұл - аға буын ардагерлеріміздің жанқияр ерлігі мен еселі еңбегінің жемісі. Уақыт өткен сайын сұрапыл соғыстың дүрбелең оқиғалары алыстап барады. Десек те, Отан үшін от кешіп, кеудесін оққа тосқан баһадүр бабаларымыздың ерен ерліктері ұмытылмайды. Сұрапыл Ұлы Отан соғысының басталған кезінде, елімізден жалпы саны 1 млн 200 мыңдай адам соғысқа аттанған еді. Отан үшін от кешкен жауынгерлеріміздің жартысы жат жерде жан тапсырып, аман қалғандары қайтып оралды. Солардың бірі Жамалетден Исқақов.

Жеңіс туын арқалап, аман қайтқандардың арасында Жәнібек ауданының тумасы Жамалетден Исқақов та бар. Бүгінде бұл батыр бабамыздың жасы 97-ге келген. Уақыт өткен сайын жүріс-тұрысы қиындай түскен. Осындай қайсар қарияларымыздың қатары азайып бара жатқандығы жанға батады. Батыр бабаларымыздың қатары сирегенімен, ерен ерліктері еш ұмытылмайды. 19 жасында әскерге шақырылып, ұрысқа бірнеше ай дайындалады. Кейін Сталинград даласындағы жау әскеріне қарсы майданға аттанады. Батыр бабамыз Отан алдындағы әскери борышын Запастағы 36-шы полк қатарында өтеді. Ұрыс даласында алған ауыр жарақаты салдарынан бірнеше ай госпитальде ем алып, елге оралып, еңбекке араласып, маңызды міндеттерді атқарады. Өз ғұмырында Отан үшін от кешкен батыр бабаның тілегі тек бүгінгі күннің тыныштығы. Жасы 100-ге таяған қарияның кеудесі орденге толған. ІІ-ші дәрежелі « Ұлы Отан соғысы» ордені, "Сталинградты қорғағаны үшін", "Германияны жеңгені үшін", "ұлы Отан соғысы жылдарындағы ерен еңбегі үшін" «Маршал Жуков», «Еңбек ардагері», «Еңбекте үздік шыққаны үшін» және «Қазақстанның ерен еңбегі үшін Қазақстан Республикасының тәуелсіздігіне 10 жыл» медальдарымен марапатталған.

Санаулы күннен соң Ұлы жеңістің 75 жылдығын тойлағалы отырмыз. Осы орайда арна тілшілері Ұлы Отан соғысының ардагері Меңжан Ғабдолұлының үйіне барып батырмен тілдесіп, жағдайын біліп қайтты. 94 жасқа аяқ басқан ардагер бүгінгі ұрпаққа бейбіт күннің қадірін біліңдер деген кеңесін айтады.

Менжан Абдрахманов 1926 жылы 26 қарашада Сырым ауданының Жымпиты ауылында дүниеге келген. Ұлы Отан соғысы жылдарында 49- шы қосалқы артиллериялық полкта, 13-ші оқыту автополкінде, 52-ші гвардиялық минометті полкінде еңбек етті.Менжан Абрахманов қайсарлығы үшін «Құрмет белгісі» орденімен, «Ұлы Отан соғысының ІІ дәрежелі» орденімен және «Жапония соғысындағы Жеңісі үшін», «Германия соғысындағы Жеңісі үшін», сондай-ақ, «КССР ІІД мінсіз қызметі үшін» медальдарымен марапатталған. Бүгінде Орал қаласында 48 соғыс ардагері, 3 мыңнан астам тыл еңбеккері бар. Оларға мемлекет тарапынан тиісті деңгейде қолдаулар жасалып жатыр.

1926 жылы Орынбор облысында дүниеге келген Дмитрий Волченко Отан алдындағы борышын өтеуге 18 жасында Башқұрстан қаласынан аттанады. 5 ай көлемінде әскер қатарында ұрыс қимылдарына әзірленеді. Жауға оның қолынан алғашқы оқ Минск қаласында атылады. Кейіпкеріміз 51-ші армияның 76-ші атқыштар полкінің құрамында Кенигсбергтің солтүстігінен Рига шығанағы аралындағы аумақта, кейін Шығыс Пруссиядан Магдебургке дейін, одан Германия шебіне дейінгі аралықта Отанын жаудан қорғау үшін қызмет етеді.Майдангер соғыста екі мәрте жарақаттанады. Жанарына мина ұшқыны тиіп, бір көзіне зиян келеді. Кейін оң жақ иығынан жараланады. Ал, Жеңіс туралы ақжолтай хабарды Германиядан естиді. 1947 жылға дейін Магдебург қаласындағы госпитальдердің бірінде қызмет атқарады. 1950 жылы ғана елге оралып, ауыл шаруашылығы саласында еңбек етіп, зейнетке шығады. Батырдың кеудесі орден-медальға толы. Бүгін олардың қатары Ресей Федерациясының Президентінің жарлығымен бекітілген Жеңістің 75 жылдық медальімен толықты. Оны Орал қаласының қорғаныс істері жөніндегі басқармасының бөлімшесінің бастығы Қуат Ахметқалиев табыстады. Қазір Дмитрий Волченко ұрпағының қызығын көріп отыр. Биыл ардагерлерге мемлекет тарапынан 1 млн теңге көлемінде қаржылай қолдау көрсетілді. Сала мамандарының айтуынша, аталған сома ардагерлер есепшотына аударылған. Қазір облыста 62 ҰОС ардагерінің көзі тірі. Олардың 48-і Орал қаласында тұрғыны.