Ұлы Жеңіс үшін айқасқан жандар туралы арнайы айдарымызды жалғастырамыз. Қан майданда толарсақтан саз кешіп, қиын- қыстау күнде елді жауға бермеген барша жауынгердің ерлігі бүгінгі ұрпаққа үлгі. Бүгін сұрапыл соғыста жаралаған жандарға пана болып, емдеген медбике болған Алевтина Митрохинаның ерлігі жайлы баяндамақпыз. Кешегі қан майданда мыңдаған адамның өмірін сақтап қалған маман бүгінде тоқсанның төртеуіне келіпті.

Қан майданда қару асынып, елін жаудан қорғаған батыр қыздардың қарасы қалың. Ұшақты тізгіндеп, пюлюметін арқалап, мыңмен алысқан арулардың есімі тарихта алтын әріппен жазылды. Қарудан бөлек, майдан шебінде жараланған жандардың өмірін ажалдан арашалаған, бұрымдылардың қарасы қалың. Солардың бірі- Алевтина Митрохина. Ол соғыс басталған тұста 17 жаста болыпты. Бойжеткен Саратов облысынан майданға аттанған.

Мыңдаған адамның өмірін құтқарған Алевтина Тифомейқызы соғыстан кейін, Оралға келіп, медициналық оқу орында білімін жетілдіріпті. Кейін ол аталмыш білім ордасында зейнетке шыққанша, сабақ берген. Кейіпкеріміз елдің дамуына ат салысып, түрлі қоғамдық қызметте жұмыс жасады.

94 жасар Алевтина Митрохинаның ерлігі бүгінгі ұрпаққа үлгі. Соғыс пен бейбіт күнде адам өмірін ажалдан құтқарған кейіпкеріміз жеңістің 74 жылдығына арналған жырымен бөліскен еді.

Ешкім де, еш нәрсе де ұмытылмайды! Орал қаласында Ұлы Жеңіс мерекесі кең көлемде аталып өтті. Бұл күннің басты кейіпкерлері - қатары күн санап сирей бастаған ҰОС ардагерлеріне Жеңіс күнінде айрықша құрмет көрсетілді. Бір ғасырдан аса ғұмыр кешкен ардагер-жауынгер Семен Акимович Данилиннің үйіне әскери бөлім мен әкімдік қызметкерлері арнайы құттықтай барып, тосын сый жасады.

Әкімдік қызметкерлері мен Ұлттық гвардия өкілдері қарт жауынгерді Ұлы Жеңіс күнімен құттықтау үшін арнайы келді. Қонақтарды қарсы алуға аулаға шыққан ардагер тосын сыйға бөленді. Көп қабатты тұрғын үй ауласында ойнаған оркестр ҰОС соғысы жылдарындағы әндерді шырқады. БҚО әкімі мен ҚР Ұлттық гвардия қолбасшылығы атынан ардагерге мерекелік сый-сыяпат тарту етті.

Отты жылдардың куәгері болған ақсақал Жеңіске жетуде сарбаздардың бойындағы батылдық пен Отансүйгіштіктің өлшеусіз күш болғанын айтады. Ардагер жастарды партиот болуға шақырады.