Қазіргі заманда нәзік жандылардың меңгермеген кәсібі, атқармаған жұмысы қалмады. Арна тілшілері көктемнің шуақты мерекесі халықаралық әйелдер күні қарсаңында саналы ғұмырын еңбекке арнап, отбасының ұйытқысы болып, өскелең ұрпаққа үлгі бола білген аналармен жүздесті. Бүгінгі кейіпкеріміз- Круглозерныйлық Марина Кладчикова. Ол жастайынан көкөніс егумен айналысып, кейін жанұясымен бірге өз кәсібін ашқан.

Марина Кладчикованың жұмыс күні жылыжайдағы барлық өнімін тексеруден басталады. Кейіпкеріміз жанұясымен бірге осыдан 18 жыл бұрын кәсібін ашқан. Жастайынан еңбекке араласқан Марина Юрьевна Кеңес үкіметі тарағаннан кейін, алғашында бау-бақша салып, күнелткенін айтады. Кейін, жолдасымен жер алып, картоп пен пияз өсіруді қолға алады. Мінекей, тынымсыз еңбектің арқасында Кладчиковтар әулеті жылыжай өсіру ісінде көш бастап тұр. Бүгінде кәсіпкер 13 гектардай жерге ие болып, азаматтарға қажетті көкөністерді өсірумен айналысады. Сонымен қатар, Марина Юрьевна екі перзент тәрбиелеп, немере сүйіп отырған әже.

Бүгінде кәсіпкердің 7 жылыжайы бар. Марина Юрьевна мен оның жұмысшылары егу маусымына дайындықты бастап кеткен.

Жомарт жердің төсіне бау-бақшасын егіп, бел жазбай еңбектеніп келе жатқан кейіпкеріміз тек өнім өсіріп қана қоймай, қайырылымдықпен айналысып, әлеуметтік аз қамтылған отбасыларға жәрдемдесіп келеді. Өмірін көкөніс өсіруге арнаған кәсіпкер ауылдың қоғамдық өміріне белсенді араласады,- дейді жергілікті атқамінерлер.

Саналы ғұмырын еңбекке арнап, жоқ-жітікке көмектесу парызым деп білген Марина Юрьевна келешекте кәсібін дөңгелентіп, оралдықтарды жаңа піскен көкөністермен қамтамасыз ету жолындағы қызметін жалғастырмақ.

2018 жылдың 5 айында Батыс Қазақстанда тіркелген заңды тұлғалардың 1565 -і мемлекетке төленуге тиісті салықты төлемеген. Қазір олардың мемлекет алдындағы қарызы 6 млрд теңгеден асып жығылады. Салықтан жалтарып жүргендердің қатарында жеке кәсіпкерлер де бар. Қазіргі таңда, олардың саны 3700-ден асады. Жеке кәсібін ашып кәсібін дөңгелентіп отырған жандар мемлекеттің қазынасына 379 млн теңгедей бережақ. Алайда, сала мамандары биылғы жылы мемлекетке төленбеген салықтың мөлшері аз дегенді айтады.

Мемлекеттік кірістер басқармасының келтірген дерегіне сүйенсек, биылғы жылдың бірінші мамырындағы санақ бойынша өңірімізде заңды тұлғалардың арасында ең үлкен мемлекетке төленбеген салықтың мөлшері 415 млн теңгені құрап отыр. Бұл бір-ақ, кәсіпорынның мемлекет қазынасына төлемеген қаражаты ғана. Өңірімізде қызмет жасап жатқан заңды тұлғалардың мемлекет алдындағы бережағы 6 млрд 224 мың теңге. Салықтан жалтарғандардың қатарында жеке кәсіпкерлер де бар. Бүгінгі таңда, олар 379 млн теңге мемлекетке қарыз. Биылғы жылы салықты көп мөлшерде төлемеген кәсіпорындардың он бесіне қылмыстық іс қозғалыпты. Алайда, сала мамандары биылғы жылы салық төлемегендердің саны азайып отыр дегенді айтады.

Облыс бойынша көлік тізгіндеген жүргізушілердің 30 мыңдайы көлік салығын төлемепті. Сол себепті 21 автокөлік арнайы айып тұрағына қойылу арқылы, 3 млн теңгеден астам қаражат мемлекеттің пайдасына өндірілген.

Көлік үшін төленбеген салықты өндірудің түрлі жолдары бар. Олардың бірі жергілікті полиция қызметкерлері мен мемлекеттік кірістер басқармасының бірлескен рейдтік шаралары. Арнайы техникамен жабдықталған полиция көлігі салықтан жалтарып жүрген жүргізушілерді 100 метрге қашықтыққа дейін анықтай алатын мүмкіндікке ие. Құқық қорғау саласы мен мемлекеттік кірістер департаментінің мамандары бірлескен рейд барысында жүргізушілердің көлікке салығы тексеріліп, олардың құқықтары түсіндіріледі.

Сала мамандары мемлекетке төленетін салықты биылғы жылдың 31 желтоқсанына дейін төлеуге кеңес береді.