Еліміз бойынша қыркүйек айында адам папилломасы вирусына қарсы екпе салу жұмыстары басталады. Жатыр мойыны әйелдер арасындағы онкологиялық аурулар статистикасы бойынша сүт безі обырынан кейінгі екінші орында тұр.Адам папилломасы вирусы - бұл ауыз қуысы мен жыныс мүшелерінің терісі мен шырышты қабығына әсер ететін ауру. Оның 200-ден астам түрі бар. Көп жағдайда бұл инфекция 2-3 жылдан кейін өздігінен өтеді және көбінесе адам үшін зиян келтірмейді,- дейді дәрігерлер.Жаппай екпе салудың негізгі контингенті 11-жастағы жасөспірім қыздар. Олар екпені ата-аналарының жазбаша келісімімен қыркүйек айынан бастап тегін ала алады. Онкологтердің мәліметінше, әйелдер арасында жатыр мойыны обыры 2-ші орында. Бірінші орында-сүт безі обыры. Жатыр мойыны обырының алдын алудың бірден бір жолы - вакцинация және скрининг. Қыздар үшін қыркүйек айында ұсынылатын вакцина бұл басты және негізгі қорғаныс болмақ екен.Айта кетейік, былтыр өңірде жатыр мойны обырының 100-ден астам жағдайы тіркелді. Оның ішінде 3-еуі 30 жасқа дейінгілер. Олардың көбісі көз жұмған. Жауыпты сала мамандары аурудың жыл сайын көбейіп бара жатқанын алға тартады. Сақтықта қорлық жоқ демекші, дәрігерлер жаппай вакцинация алуға шақырады.

Батыс Қазақстан облысында жыл басынан бері «Ashyq» қосымшасы деректері бойынша үйлерінде оқшаулануы тиіс 729 адамның карантин талабын бұзғаны анықталды. БҚО санитарлық-эпидемиологиялық бақылау департаментінің басшысы Мұхамғали Арыспаевтың өңірлік коммуникациялар қызметі алаңында өткен брифингте мәлім еткеніндей, олардың 719-ның - «қызыл» мәртебесі бар.Яғни, олар коронавирус жұқтырған адамдар. Қалған оны - аурулармен қарым-қатынаста болғандар. Деректерге сәйкес ҚР Әкімшілік құқықбұзушылық кодексі 425-бабы 1-бөлігіне сәйкес жеке тұлғаларға 54 хаттама толтырылып, 2 млн 481 мыңнан астам теңге көлемінде айыппұл салыныпты. Жыл басынан бері 9047 адамның індет жұқтырғаны анықталса, соның 4774-і - ауру белгісі барлар, 4273-і - симптомы жоқтар. 1 ақпаннан бастап 1949 науқас тіркелді. «Күні бүгін облыста 51 694 адам (37,1 пайыз) ревакцинациядан өтсе, соның 947-сі кеше егілген.
Мамандар ревакцинация мәселелері бойынша тұрғындар арасында түсіндіру жұмыстарын жүргізуде. 1 ақпаннан бері мемлекеттік шекарадан анықтамасыз өткен 300 жолаушының бесеуінен, халықаралық жүк тасымалымен айналысатын 220 жүргізушінің 13-інен індет табылыпты.

Облыста КВИ шалдыққан науқастар өткен аптамен салыстырғанда 26 пайызға төмендеді. Оған қоса кешегі күні өңірде вирус жұқтырудың 15 дерегі тіркелген. Тәулігіне вакцина қабылдамаған 10-15 науқас ауруханаға түсіп жатыр. Бұл туралы бүгін облыстық коронавирусқа қарсы жедел штаб отырысында облыстың бас дәрігері Арман Қалибеков мәлімдеді. Аумақ айдан аса уақыт "сары" аймақтар тізімінде. Эпидемиологиялық ахуалды одан әрі жақсарту үшін енді міндетті вакцинациялау шарасы жүзеге асырылатын болады.Облыс әкімі штаб отырысында тұрғындарды жаппай екпе алуға шақырды. Қазір өңірдегі барлық инфекциялық ауруханаларда науқастар толымдылығы 27 пайызды құрайды.Енді кәсіпорын қызметкерлері коронавирусқа қарсы екпе алуы тиіс. Ал екпе алмағандардың ауруға қарсы медициналық көрсетілімі болуы шарт. Олай болмағанда жұмыс орнына кіруге рұқсат жоқ. Бұл туралы облыстың бас санитар дәрігері Мұқамғали Арыспаев мәлімдеді. Сонымен қатар бұдан былай мониторингтік топтар енді барлық жұмыс орындарын аралап, санитарлық талаптарды сақмағандарға айыппұл сала алады. Мәселен, ірі кәсіпорындар мен кәсіпкерлік субъектілеріне 4 млн. 500 теңгеге айыппұл салынса, шағын кәсіпкерлерге 670 мың теңге көлемінде айыппұл тағайындалады.

Аймақта осы аптадан бастап карантиндік шектеулер күшейтіледі.БҚО әкімі Ғали Есқалиев жедел штаб отырысында коронавирустың таралу көрсеткіші былтырғыға қарағанда 2,5 есе жоғары екенін хабарлады. Айтты. Сәйкесінше қайтадан карантиндік шаралар 17-ші шілдеден бастап өз күшіне енетін болады. Әсіресе, маусым мен шілде айларында аудандарда эпидахуал нашарлап отыр. Мәселен Казтаолов, Жәнібек пен Шыңғырлауда ауру жұқтырғандар саны артып отыр. Жағдай бұл аудандарда жақсармайтын болса, қосымша аурухана төсектерін ашуға тура келеді.Жедел штаб отырысында денсаулық сақтау басқармасы басшысының міндетін атқарушы Арман Қалибеков өңірдені вакцина алушылар туралы мәліметті ұсынды. Оның айтуынша қазір тұрғындар тарапынан вакцина алуға ынта жоғары. Бұған дейін мұндай белсенділік сәуір айында байқалған.17 шілдеден бастап карантин талабы күшейтілмек. Жаңа қаулыда сауда үйлерінің, спорт кешендерінің жұмыс кестесін қысқарту, «Ashyq» қосымшасына тіркелмеген нысандар қызметіне тыйым салу, демалыс күндері қоғамдық көлік пен ашық базарлар жұмысын уақытша тоқтату қарастырылған. Облыс әкімі Ғали Есқалиев карантин режимін күшейтуді қолдайтынын айта келіп, карантиндік талаптар егде жастағыларға психологиялық тұрғыда әсер етінін ескеріп бірқатар ашық аспан астында шаралар ұйымдастыруды сала өкілдеріне тапсырды.Айта кеткен жөн облыста алдағы уақытта барлық мекемелер ашық жүйесін жұмысқа енгізуі тиіс. Қазіргі уақытта «Ashyq» қосымшасына облыс бойынша 610-нан астам нысан тіркелген. Қазіргі уақытта осы қосымша арқылы 54 (28-і – «қызыл», 26-сы – «сары» дәрежесі) адамның карантин талабын сақтамай, көше кезіп жүргені анықталған.

Жаһанды жайлаған індетпен күрестің ең тиімді де, дұрыс жолы - оған қарсы жаппай екпе салдыру, ұжымдық иммунитетті қалыптастыру. Бұл - әлем мойындаған шешім, оны Мемлекет басшысы Қасым-Жомарт Тоқаев та шегелеп айтып келеді. Денсаулық сақтау министрлігінің алдында қыркүйек айына дейін еліміздің 10 миллион азаматын індетке қарсы вакциналау міндеті тұр. Ол үшін айына кемі 2 миллион тұрғын екпе алуы шарт. Соңғы күндері Оралдағы жылжымалы егу пункттеріне келушілер саны артқан. Бүгінгі таңда облыс халқының 30 пайызы ауруға қарсы екпе алғанын ескерек, жалпы халықтық иммундық жүйені қалыптастыру үшін тағы да 30 пайыз тұрғын вакцина алуы тиіс. Өңірде екпе қабылдағандардың жалпы саны - 122 187 адамға жетті. Мәселен, ауруға қарсы екпе алғандар арасына өлім жағдайы тіркелмеген. Ал ауруды жұқтырғандардың өзі жеңіл түрімен ауырып, бірқатары тіпті вирус жұқтырғандарын сезбеген.
Бүгінгі күні екпе қабылдағандардың ішінде зейнеткерлер өте көп. Олар қазіргі уақытта халық арасында екпеге қарсы түрлі үгіт-насихат жүргізіп жүргендерге медициналық препарат туралы мамандардан ғана нақты ақпарат алуға кеңес береді. Өйткені ғаламторды жайлаған жалған, жағымсыз жаңалықтар шындыққа жанаспайды,- дейді көпті көрген кемеңгер қариялар.Ал 85 жастағы Надежда Ахтырская емханадан екпе алғанын растайтын құжатты қолына алды. Енді зейнеткер ағзасы ауруға қарсы төтеп беретінін сеніммен айтты.Жекелеген аудандарда екпе алу қарқыны жоғары. Мысалы, Жәнібек ауданында тұрғындардың 57, Тасқалада 53 пайызы егілген. Олар ұжымдық иммунитет қалыптастыру үшін халықтың кем дегенде 60 пайызы екпе қабылдау керектігін жақсы түсінеді. Әсіресе, медицина қызметкерлері , мұғалімдер және құқық қорғау органдарының өкілдері белсенділік көрсетуде.

Коронавирусқа қарсы екпе алған жандардың қатарын арттыру үшін әкімдік, министрлік түрлі маркетингтік шараларды қолдана бастады. Бірі вакцина алған жандардың арасында пәтер ойнатса, енді бірі көлік пен ақшалай сыйлық, телефон мен түрлі техниканы ұтысқа тігеміз деп жанталасып жатыр. Жақында Білім және Ғылым министрі Асхат Аймағанбетов те студенттер мен оқытушылардың денсаулығын қорғау үшін вакцина салуда ынталандыру шараларын қолдану керек деп тапсырма жүктеген-ді. Бүгінде Махамбет Өтемісов атындағы Батыс Қазақстан университеті екпе салғандарға жеңілдік жариялап отыр. Білім ордасы "Мен өмірді таңдаймын" атты акция жариялады. Осы акция 1-шілдемен 31-тамыз аралығында ұйымдастырылмақ. Коронавирусқа қарсы екпе алған 120 студент пен 50 оқытушыға арнайы сый дайындалыпты. Ақылы бөлімде оқитын немесе оқуға тапсырған талапкерлерге 5 пайыз жеңілдік, педагогтарға 30 мың теңге көлемінде сыйақы төленеді. Және студенттерге Нұр-Сұлтан, Түркістан қалаларына саяхат, фитнес-клубтың абонементі берілмек.

Бүгін барлығы 27 адамға екпе салынды. Дәрігерлердің айтуынша, вакцина қабылдағандар арасында осы күнге дейін ауру жұқтыру дерегі болмапты.Балалар ауруханасының ұжымына №6 қалалық емхана дәрігерлері қызмет көрсетті. Дәрігерлер емдеу орнында дүниеге келген сәбиден бастап ем алатындықтан, әр адамда қорғаныш жүйесенің болуы өте маңызды дейді.
Қазақстанның барлық аймағында коронавирустық инфекцияға қарсы вакцинация басталғалы Батыс Қазақстан облысында препараттың 1-ші компонентін 95 064 тұлға қабылдаса, 2-ші компонентімен 62 977 адам алған. Вакцинадан кейін теріс әсер, аллергиялық реакция байқалмаған. Ал егілген адамдар арасында COVID-19 дертін жұқтыру оқиғалары тіркеліп жатқаны рас. Олардың саны өте аз. Сондай-ақ індетті жұқтыру жағдайларының көбі препараттың тек бір ғана дозасын алып үлгергендер арасында тіркелген, яғни КВИ-ге қарсы иммунитет әлі толық қалыптаспаған.

БҚО-да ковид жұқтырғандар саны қайтадан өсуде. Осы аптада өңірімізде коронавирус инфекциясын жұқтырғандардың қатары қайта көбейе бастаған. Қоғамдық көліктерде адамдардың көбі бетпердесіз жүр. Тұрғындардан бетперде киюді талап етпеген жолаушы тасымалдаушы компанияларға енді субсидия берілмейді. Бұл туралы облысы әкімі Ғали Есқалиевпен өткен жедел штаб отырысында айтылды. Облыстық денсаулық сақтау басқармасы басшысының міндетін атқарушы Арман Қалибековтың айтуынша, соңғы кездері түрғындардың вакцина алу қарқыны да төмендеген. Мәселен, сәуір айында күніне 3000-дай тұрғын вакцина алған болса, қазіргі кезде күніне 1000 адам, сенбі-жексенбі күндері 400-дей тұрғын вакцина алады. Соңғы аптада өңірде коронавирус инфекциясын жұқтырғандар санының өсуі байқалады. Мәселен, 1-7 маусым аралығында өңірде 634 адам инфекция жұқтырса, 8-14 маусым аралығында 712 адам ауруға шалдыққан. Өсім 11% құрайды. Қала әкімінің айтуынша, қоғамдық көліктерде қала тұрғындарының басым бөлігі бетпердесіз жүретін болған. Жүргізушілер мен кондукторлар тұрғындардан тұмша режимін талап етпейді, - деп атап өтті шаһар басшысы. Облыс әкімі Ғали Есқалиев мониторингтік топтардың жұмысын жандандыру қажеттігін айтты. Облыста "Ашық" мобильді қосымшасын дұрыс қолданбаған  35 кәсіпкерлік субъектісінің жұмысы екі аптаға тоқтатылыпты.Облыс әкімі маска режімін сақтамай, тұрғындар өміріне қауіп төндірген жолаушы тасымалдаушыларға субсидия берілмейтіндігін айтты.Сондай-ақ вакцинаның ІІ компонентін ала алмай жүрген тұрғындар шағымы да облыс басшысының назарынан тыс қалмады. Бұл мәселені кезек күттірмей, шұғыл шешуді облыстық денсаулық сақтау басқармасы басшысының міндетін атқарушы А.Қалибековке тапсырды.

Бүгін Батыс Қазақстан облыстық денсаулық сақтау басқармасы басшысының міндетін атқарушы Арман Қалибеков коронавирусқа қарсы вакцина алды. Оның айтуынша бүгінге дейін өңірде 7 мың адам коронавирусқа қарсы екпе салдырған.Осыдан алты ай бұрын ковидпен ауырған Арман Талғатұлы бүгін өзінің тұрғылықты мекенжайы бойынша тіркелген №5 қалалық емханада дәрігерлік тексеруден өтіп, «Спутник V» вакцинасының бірінші компонентін қабылдады. Айта кеткен жөн облыста бүгінге дейін 7000 адам індетке қарсы егілген. Вакцина алғандардың көпшілігі - медицина қызметкерлері. Сондай-ақ педагогтар, құқық қорғау және басқа сала өкілдері де бар. Мәселен, 7000-нан аса адам тіркеуде тұрған шаһардың қақ ортасындағы №1 емханада бүгінге дейін 700-ге жуық адам өз қалауларымен егілген. Медициналық ұйымда вакцинациялауға арналған екі процедуралық кабинет жасақталған. Мұндағы дәрігерлердің айтуынша, 4000-ға жуық тұрғынға екпе жасу жоспары бар. Қазірдің өзінде вакцина салдыруға ниет танытқан қарапайым халықтың қарасы қалың. Олар арнайы бекітілген кесте бойынша шақыртылуда.
Қазіргі кезде Орал қаласы мен аудан орталықтарында отыз шақты егу кабинеттерінде тұрғындарды кесте бойынша вакцинациялау жүргізілуде. Сәуір айының аяғына дейін облысқа тағы да 49700 доза вакцина әкелінбекші.

Өңірде соңғы төрт күнде 104 адам коронавирус жұқтырған. Бүгінгі күнгі деректер бойынша 195 төсек-орынға арналған 4 карантиндік стационарда 11 науқас жатыр. Стационарлар толымдылығы 5,6%-ды құрайды. Індетті жеңудің тиімді тәсілі - вакцинациялау. Облыста бүгінгі күні 5250 адам Ресейде өндірілген Спутник В препаратын қабылдаған.Эпидемиолог мамандардың сөзіне сенсек, аурушаңдық әлі де өршуі мүмкін. Өйткені наурыздағы бірқатар мейрамдарды қоспағанда садақа, той-томалақтың тыйылмай отырғаны да дерттің өрши түсуіне себеп болуда. Сонымен қатар адамдар коронавирусты негізінен сауда үйлері мен базарларда, қоғамдық көліктер мен емханаларда, жұмыс орындарында жұқтыруда. Айта кеткен жөн кеше Ел Президенті Қасым-Жомарт Тоқаев пандемияға тосқауыл қоюдағы тиімді тәсіл - жаппай вакцинациялау ғана екенін атап өтті. Яғни, қытайлық кеселдің бүгінгі күні жаңа мутацияланған түрлері пайда болып, одан қаза болғандар саны да күрт көбейіп отыр. Дерттен сақтану әр адамның өзіне байланысты. Егер де сәуір айының соңына дейін ел азаматтары кезең-кезең бойынша ковидке қарсы вакцинаны қабылдар болса, жағдай едәуір жақсаруы мүмкін. Ал өңірде ақпан айынан бері препарат қабылдаған тұлғалар арасында денсаулығына байланысты ешқандай шағым айтылмаған. Айта кеткен жөн бүгінгі таңда облысқа тағы 4000- нан астам спутник В препараты келген.   БҚО бас мемлекеттік санитар дәрігерінің 30 наурыздағы қаулысы 1 сәуірден бастап күшіне енді. Осыған сәйкес тұрғындардың санитарлық талаптарды сақтауын қадағалайтын мониторингтік топтардың жұмысы да күшейтілді..