Ұрлық – TDK-42

Велосипед ұрлаған күдікті ұсталды

Evgeni St — Tue, 27 Jul 2021 13:03:58 +0000

0:00 / 0:00

Бұл қала көшелеріндегі бейнебақылау камерасы. Өткен-кеткенді қырағы көзіне іліп алатын құрылғыға осы жолы бетіне бетперде киген азамат түсіп қалған. Бастапқыда жайбарақат алаңсыз жүріп келеді. Кейін есік алдында тұрған велосипедті сүйреп алып бара жатқаны байқалады. Оның бұл әрекетінің ұрлық екенін бірден аңғарып, күдіктену қиын. Белгілі болғандай видеодағы азамат бір күнде осындай жолмен сегіз велосипедті қолды қылыпты.
Күдікті орталық көшедегі, ауладағы тіпті есік алдындағы велосипедтерді тізгіндеп кетіп отырған. Кілтпен бұғатталып тұрғандарын сындырып алған. Погондылар күдіктіні бейнебақылау камерасы арқылы анықтапты. Бүгінде ұрланған заттар иелеріне қайтарылуда. Ұрыдан зардап шеккен жандардың бірі-Жанар ханым. Қызының велосипеді жоғалған бойда ол арыз жазып, қалалық ПБ келіпті.
Айта кету керек, күдікті қолды қылған шайтан арбаларды арзан бағаға сатуды кәсіп қылған. Оның өзге де қылмыстарға қатысы бар-жоғы анықталып жатыр. Зардап шеккендердің арасында полицияға арыз түсірмегендер де болуы мүмкін дейді мамандар. Жалпы жыл басынан бері 70-ке жуық велосипед ұрланған екен.

37 ҰРЛЫҚ ФАКТІСІ БОЙЫНША ҰСТАЛҒАН КҮДІКТІ ТЕРГЕЛУДЕ

Evgeni St — Thu, 18 Mar 2021 12:46:51 +0000

Екі жыл бойы ұрлықпен айналысқан азамат құрықталды. Ол кезекті рет қылмыс жасау үстінде бейнебақылау камерасына түсіп қалған. Күдікті 2019 жылдан бастап осы кезге дейін құрылысы бітпеген жер үйлер мен гараждардағы заттарды ұрлап келген. Өзгенің мүлкін заңсыз иемденуді әдетке айналдырған азаматтың үстінен 37 факті бойынша қылмыстық іс қозғалды.
Ал мына видеодан құрылыс материалын ұрлап, орталық көшеде емін-еркін кетіп бара жатырған күдіктіні көруге болады. Ш. есімді 1989 жылғы азамат бұрын да істі болыпты. Ұрлаған құрал-саймандарын базарға апарып сатып, ақшаласа, алтын бұйымдарды ломбардқа өткізіп жіберген. Жалпы шығын көлемі 7 млн. теңгені құрайды. Күдікті азамат қолға түскен сәттен бастап осы келтірілген шығынның 65 пайызын өтеп үлгерген.
Айта кету керек, баукеспе ұры деп айып тағылған күдікті кезекті қылмысы кезінде тұтылған. Енді заңсыз жолмен ақша тауып, қылмысқа барғаны дәлелденсе, ол алдағы 7 жылын темір тордың ар жағында өткізуі мүмкін. Жалпы БҚО-да осы кезге дейін 412 ұрлық фактісі тіркелген. Соның 135-і ауыр қылмыс санатында. Басым бөлігі пәтер ұрлығы екені белгілі болып отыр.

ӘККІ ҰРЫ ҰСТАЛДЫ

Evgeni St — Wed, 17 Feb 2021 12:28:23 +0000

Орал қаласында ұрлық дерегі азаймай тұр. "Пәтер тоналды", "темір тұлпар ұрланды"- дегенді жиі құлағымыз шалады. Қылмыстық жағдайларды болдырмау мақсатында қаланың полиция басқармасы жұмысты күшейтті. Нәтижесінде гараждарды тонап жүрген әккі ұры тұтқындалды. Күдікті кезекті ұрлық кезінде қолға түскен.
Орал қаласының тұрғыны 2020 жылдың қазан айынан осы күнге дейін гараждардың есіктерін бұзып кіріп, үй иелерінің жеке мүліктерін ұрлап келген. Оңай келген олжаларды күдікті базарда, көшеде еркін түрде сатып, пайда тауыпты. Азамат бұрын да істі болған көрінеді. Сол әдетіне басып, тағы ұрлық жасап ақыры қолға түсті. Ал қолды болған заттарды күдіктіден тәркілеген полиция қызметкерлері иелеріне қайтарып беруде. Осы орайда өзінің жеке заттарын таныған қала тұрғындары болса, 102 номеріне хабарласуын сұрайды.
Жалпы жыл басынан бері Орал қаласында 187 ұрлық дерегі тіркелген. Өткен жылы бұл көрсеткіш 385 фактіні құраған болатын.

ҰРЛАНҒАН КӨЛІКТЕР АТЫРАУДАН ТАБЫЛДЫ

Evgeni St — Thu, 11 Feb 2021 12:42:33 +0000

Оралдан ұрланып, Атыруда сатылған көліктер иелеріне қайтарылды. Алғашқы ұрлық оқиғасы 24 қаңтар күні тіркелген. Орал қаласындағы Исаев көшесіндегі 5 қабатты үйдің ауласында тұрған қара түсті ВАЗ 2114 маркалы көлік жоғалған. Иесінің сөзіне сүйенсек, 23 қаңтарда, сағат 21.00- де жұмыстан келе сала ол темір тұлпарын ауласына әкеліп қойған. Таңмен тұрып қараса, орнынан таппай қалыпты. Екінші көлік ұрлығы 31 қаңтардан 1 ақпанға қараған түні тіркелген. Оны Т.Масин көшесіндегі балабақшаның қасынан заңсыз тізгіндеп кеткен. Осы екі көліктің ұрлық фактісі бойынша дереу тергеу тобы құрылды. 8 ақпанда күдікті екі тұлғаның сұлбасы анықталып, деректер табылған. Олардың бірі Атырау облысының, екіншісі Батыс Қазақстан облысының тумасы екен.

Атырау қаласына әкетілген көліктерді Абай ПБ жедел уәкілдері таңға жақын Орал қаласына жеткізді. Жуықта өз иелеріне қайтарылады. Жалпы көлік иелеріне 1,5 млн теңге көлемінде материалдық залал келген. Айта кету керек, ұрланған көліктерді екі күдікті Атырауға бара сала сатып жіберген. 1992, 1994 жылғы жігіттер бұрындары да істі болыпты. Өзгенің мүлкін пайдаланып, оңай ақша таппақ болғандар заң алдында жауап беретін болады.

Жыл басынан бері Орал қаласы аумағында 8 көлікті заңсыз тізгіндеп кету фактісі тіркелген. Ал көлік ұрлығы орын алмапты.

Ұрлық үстінде ұсталды

Evgeni St — Tue, 02 Feb 2021 12:56:25 +0000

Ұрлық үстінде ұсталды. Бейнеқатардан ер азаматтың қашып бара жатқаны көрінеді. Ол 23 қаңтарда сағат 16.30 шамасында Орал қаласы, Абай даңғылы 103 мекенжайында орналасқан дүкендердің бірінің ішінде ұрлық жасаған. Полиция қызметкері дүкеннен уақ- түйек заттарды ұрлап, сытылып шығуға бет алған күдіктіні дереу ұстайды. Күдіктіні ғимаратқа кіргізіп, ұрлаған заттарын дүкен меңгерушісіне кері қайтартып бергізген. 1984 жылғы Р. есімді тұрғын ұсақ- түйек бұйымдарды ұрлап, пайдасына жаратқысы келгенін мойындады.

Пәтер тонаушы ұсталды

Evgeni St — Tue, 26 Jan 2021 12:55:17 +0000

Орал қаласында пәтер ұрлығы ашылды. 21 қаңтар күні И. есімді тұрғын Абай полиция бөліміне пәтер ұрлығы бойынша арызданып келген. Дереу тергеу тобы құрылып, тексеріс жұмыстары басталып кетіпті. Жәбірленушінің айтуынша, анасының пәтерінен қылмыскерлер 1 млн 500 мың теңге болатын алтын бұйымдарын ұрлап кетіпті. Тергеу жұмыстарының нәтижесінде 41 жасар қала тұрғыны ұсталды. Ер адам қолға түскен мезетте-ақ қылмысын мойындаған. Бүгінде ұрланған алтын бұйымдар иесіне қайтарылды.

Пәтерге төнген қатер

Evgeni St — Mon, 07 Dec 2020 12:24:02 +0000

Оралда бірнеше жер үйді тонады деген күдікпен бір азамат қолға түсті. Ол қараша айынан бастап "Ескі әуежай" ауданында қарақшылықпен айналысып келген. 1995 жылғы П. есімді азамат сағат 17.00 мен 23.00 аралығында тұрғын үйлерге ұрлыққа түсіп отырыпты. Барлық үйдің пластик терезелерін итеріп ашып, үй ішінен бағалы құндыз тондар, компьютер, ноутбуктер сынды қымбат мүліктерді ұрлаған. Үй иелерінің біріне келтірілген ең үлкен материалдық шығын 1 миллион 500 мың теңгеге бағаланып отыр. Полиция қызметкерлері бұрын бірнеше рет сотталған күдіктіні жуықта өз үйінен құрықтады. Қолының сұғанағы бар азамат қылмысын толықтай мойындады. Тәркіленген жеке мүліктер иелеріне қайтарылуда.

Көлік ұрлығы азаймай тұр

Evgeni St — Fri, 04 Dec 2020 12:34:35 +0000

Орал қаласы аумағында темір тұлпарды ұрлап кету фактісі әшкере болды. 1999 жылғы 2 жігіт "Жұлдыз" шағын ауданында көлік иесін ұрып-соғып, темір тұлпарын тартып алған. Оңбай соққы алған қала тұрғыны бірден 102-ге хабарласып арыз жазыпты. Дереу "Тосқауыл" операциясы іске қосылып, жеке қүрам іздестіру іс- шарасын қолға алған. Нәтижесінде Б.және Д. есімді 1999 жылғы азаматтар құрықталды. Оңай жолмен олжалаған көлікті олар Атырау қаласында сатпақшы болыпты. Осылайша қарақшылық шабуыл жасап, көлік иесін соққыға жығып, жұдырықтың астына алған 2 күдікті 10 жылға сотталуы мүмкін. Қылмысқа қатысы бар деген үшінші тұлға да ұсталды. Өз кезегінде күдікті барлығын мойындап отыр. Бүгінде темір тұлпар иесіне қайтарылды.

Оралда бір ай бойы ұрлықпен айналысқан күдікті құрықталды

Evgeni St — Mon, 16 Nov 2020 13:08:53 +0000

1982 жылғы, еш жерде жұмыс жасамайтын С.есімді тұлға "Солтүстік- Шығыс" аудандағы көп қабатты пәтердегі жертөле есігін бұзып кірген. Жертөледен 1987 жылғы М. есімді азаматқа тиесілі "Кордиан Сноу Кросс-2" маркалы су жаңа 4 қысқы тікенекті дөңгелектерді ұрлаған. Дөңгелектердің иесіне 65 мың теңге материалдық шығын келді. Арада біраз уақыт өтсе де күдікті енді ұсталып отыр. Ұры дөңгелектерді өзгеге сатып үлгерген. Осы кезге дейін әккі қарақшы тағы 7 эпизод бойынша қылмыс жасапты. Бүгінде тергеу амалдары жүргізілуде. Енді ұрланған заттар біртіндеп өз иелеріне қайтарылуда. Жыл басынан бері Орал қаласында 1525 ұрлық оқиғасы тіркелді.

Ұрланған көлік иесіне қайтарылды

Evgeni St — Wed, 19 Aug 2020 11:38:52 +0000

0:00 / 0:00

Орал қаласының тұрғыны темір тұлпарын небәрі 4 ай көлемінде қолданыпты. Келеңсіз оқиға осыдан 6 ай бұрын 14 наурызда орын алған. Жұмыстан келген бойда көлігін аулаға қойып, кілттеп кеткен.
Абай полиция бөліміне арыз түскен соң дереу арнайы топ құрылып, іздестіру жұмыстары басталып кетеді. Ресейлік нөмірлі автокөлік болғандықтан іздеу ұзаққа созылып, қиындықтар туғызған. Әсіресе көршілес облыстарға баса назар аударылыпты. "Шаһардағы қолды болған көліктердің басым бөлігі Атырау, Ақтөбе қалаларына әкетіліп, сол жақта сатылып кетеді",- дейді Абай полиция бөлімінің қызметкерлері. Бұл жолы да ұрланған көлік 6 айдан кейін Атыраудан табылды.
1997 жылғы күдікті Орал қаласының тұрғыны. Бұрын істі болмапты. А. есімді азаматқа қатысты тергеу жұмыстары жүргізіліп жатыр. Көлік иесі үмітімді үзбедім, табылады деп сендім дейді. Абай полиция бөлімінің қызметкерлері Атырауға барып, ұрланған көлікті алып келді.
Орал қаласында ағымдағы жылдың 7 ай ішінде 69 көлік ұрлығы тіркелген. Соның 60 бойынша тергеу жұмыстары аяқталыпты.