Шетелге заңсыз шыққан, ұрланған актвитерді қашан қайтарамыз? Үкімет тиісті заң жобасын қашан Парламентке ұсынады? «Назарбаевтық кланның» үлесі бар «Еуразиялық топ» халықтық байлықтың 40 пайызын қалай иемденіп кетті? Сотты болған Қайрат Боранбаевқа қатысты ірі істер неге тергелмей жатыр? Мәжіліс депутаттары Үкімет басшысы Әлихан Смайылов пен Бас прокурор Берік Асыловқа жолдаған сауалында осы сұрақтарды алға тартты.

Ермұрат Бәпи бастаған депутаттық топ сыртқа заңсыз кеткен активтерді қайтару мәселесін көтерді. Олар үкіметтен елден заңсыз шығарылған капиталды қайтаруға мүмкіндік беретін азң жобасын тезірек Парламентке ұсынуды сұрады. Депутат Бәпи капиталды қайтару ісінде түсініксіз кібіртік көп екенін айтады. Мысалы, назарбаевтар отбасының бұрынғы құдас, сотты болған кәсіпкер Қайрат Боранбаевқа қатысты ірі істер тергелмей қалды дейді ол.

Ермұрат Бәпидің мәліметінше, «Боранбаевтың келіншегі өз атына жазылған бизнес-ұшақты сатып жіберген. Бұл ұшақтың нарықтағы құны 30 млн долларға дейін бағаланады. Ол әйел мұндай сомадағы ақшаға қалай ие болуы мүмкін? Тиісті органдар осы сауда-саттықты біле тұра, ұшақтың қандай қаржыға сатып алынғанын анықтағанға дейін, бұл активті «мұздатып» қоюға әрекет жасамады дейді ол. Сондай-ақ, депутатты Jusan bank—ке қатысты мәселе де алаңдатып отыр.

Мәжілісмендер «Назарбаевтық кланның» үлесі бар «Еуразиялық топ» халықтық байлықтың 40 пайызын қалай иемденіп кетті?-деген сұрақтарын да алға тартты.

Депутаттар ұрланған активтерді қайтару туралы заңды бірінші кезекте қабылдауды басты мақсат етіп отыр. Ал үкімет Президент Тоқаевтың бұл құжат наурыздың 31-іне дейін дайын болсын деген тапсырмасын созбалаңға салып отыр дейді Ермұрат Бәпи.