Жеңісті жақындатқан батырлардың ерлігі туралы бейнесюжетімізді жалғастырамыз. Бүгінгі кейіпкеріміз Иван Иванович Болтанов. Отан қорғаушылар мерекесінде ардагер 97 жасқа толады. Ақсақал соғысқа мектеп бітіре сала аттанған.

Жеңіс күні жақындаған сайын Ұлы Отан соғысының ардагерлерін құттықтайтын жандар көп. Бір топ оралдық жылдағы игі дәстүрден жаңылмай, ардагер Иван Болтановты мерекемен құттықтап, мектеп оқушылары ән шырқады.

Ардагер барлық меймандарға риза. Ол ақ тілегін жаудырып, өскелең ұрпаққа бата беріп, ұзақ ғұмыр тіледі. Ұлы Отан соғысының ардагері биыл 97 жасқа толады. Ғасыр жасаған қария соғысқа Мордовиядан аттанған. Ол 7 сыныпты аяқтап, барлық комсомолдармен бірге майданға Саратов облысынан аттанады.

Иван Иванович 1948 жылы әскери қызметін аяқтайды. Ол Мәскеуге қайтып келеді. Кеңес Үкіметінің астанасында өрт сөндіру қызметіне кіріседі. Мәскеуде болашақ жарын кездестіреді. Кейін Қазақстанда Целина басталып, елімізге қоныс аударған. Ол Оралда жүргізуші болып қызмет жасаған.

Ел үшін мыңмен арпалысқан батыр 7-мамырда 97 жасқа толады. Көпті көрген қария бейбіт заманның қадірін түсінуге шақырады. Өмір бойы еңбек етіп, қызмет жасаған азамат жастарға барлық берекенің басы еңбекте екенін насихаттайды.

Ұлы Отан соғысының ардагері Скаленко Вениамин Пантелеевичь соғысқа 17 жасында аттанады. Қан майданға бозбала Бөрлі ауданынан шақырылады. Ол 1943 жылдың маусымына дейін Орал қаласында орналасқан Ленинградтық байланыс әскери училищесінде білім алады. Курсантарды Мәскеу түбіндегі Дмитр қаласына әуе қорғаныс күштерінің қатарына қосады. Ардагер соғыс жылдары мен майданнан кейін әуе қорғаныс күштерінде қызмет еткенін айтады. Вениамин Пантелеевичь училищеде морзе азбукасын жақсы меңгереді.

Соғыс жылдарында ардагер қан майданда мыңмен арпалысып, жеңісті Берлинде қарсылапты. Майдан аяқталғасын ол 1947 жылға дейін Қиыр Шығыстың шекарасында әскери қызметін жалғастырады. Жеңіспен оралған ардагер ауылына оралып, егін егіп, агроном болып, 20 жылдай еңбектенеді. Кейін түрлі жауапты қызметті атқарып, облыстық статистика басқармасынан 1992 жылы зейнетке шығады. Тоқсанның сегізіне келген қария әлі күнге дейін тың. 73 жыл бұрын отау құрған зайыбымен бірге тату-тәтті ғұмыр кешуде. Олар ойлап-күліп, немере мен шөберінің амандығын тілеп отыр. Ғасыр жасаған атай жас күнінде оқыған морзе әліпбиін ұмытпапты.

Сұрапыл соғысты бастан кешіп, қан майданда келешек үшін арпалысқан қария жастарға бейбіт өмірді бағалауды тапсырды.

98 жастағы ардагер ұзақ өмір сүрудің құпиясымен бөлісті. Қария ішімдік ішпей, шылым шекпей, жұмыс істеп, адамдарға жақсылық жасап, үнемі көмектесу керек деген кеңесін айтады. Естеріңізге сала кетейік, қазіргі таңда облыста қан майданда жаумен арпалысқан 21 ардагер қалды. Оның 17-сі Орал қаласында өмір сүреді.

Ұлы Жеңіс үшін айқасқан жандар туралы арнайы айдарымызды жалғастырамыз. Қан майданда толарсақтан саз кешіп, қиын- қыстау күнде елді жауға бермеген барша жауынгердің ерлігі бүгінгі ұрпаққа үлгі. Бүгін сұрапыл соғыста жаралаған жандарға пана болып, емдеген медбике болған Алевтина Митрохинаның ерлігі жайлы баяндамақпыз. Кешегі қан майданда мыңдаған адамның өмірін сақтап қалған маман бүгінде тоқсанның төртеуіне келіпті.

Қан майданда қару асынып, елін жаудан қорғаған батыр қыздардың қарасы қалың. Ұшақты тізгіндеп, пюлюметін арқалап, мыңмен алысқан арулардың есімі тарихта алтын әріппен жазылды. Қарудан бөлек, майдан шебінде жараланған жандардың өмірін ажалдан арашалаған, бұрымдылардың қарасы қалың. Солардың бірі- Алевтина Митрохина. Ол соғыс басталған тұста 17 жаста болыпты. Бойжеткен Саратов облысынан майданға аттанған.

Мыңдаған адамның өмірін құтқарған Алевтина Тифомейқызы соғыстан кейін, Оралға келіп, медициналық оқу орында білімін жетілдіріпті. Кейін ол аталмыш білім ордасында зейнетке шыққанша, сабақ берген. Кейіпкеріміз елдің дамуына ат салысып, түрлі қоғамдық қызметте жұмыс жасады.

94 жасар Алевтина Митрохинаның ерлігі бүгінгі ұрпаққа үлгі. Соғыс пен бейбіт күнде адам өмірін ажалдан құтқарған кейіпкеріміз жеңістің 74 жылдығына арналған жырымен бөліскен еді.