Биыл азаматтық қорғаныс саласы 25 жылдық мерейтойын атап өтеді. Ширек ғасырдан бері өрт сөндірушілер, құтқарушылар, кинологтар мен сүңгуірлер күн сайын қиын жағдайға тап болған адамдардың өмірін ажалдан құтқарып келеді. Олар көмек сұраған жандарға әрдайым қол ұшын беруге дайын.

Қазақстанда тұңғыш рет өрт сөндіру бөлімі 1895 жылы Орал қаласында өз жұмысын бастады. 125 жылда өрт сөндіру қызметі сан алуан өзгерісті бастан кешіп, жаңарудың түрлі кезеңін өткерді. Сала мамандарына да қойылатын талап күшейіп, техника да толықты. Ертеректе өрт сөндірушілердің тек қызыл жалынды сөндіруге арналған техникасы болса, қазір авариялық-құтқару құрал-саймандары жабдықталған. Жанкешті мамандардың арқасында мыңдаған адам аман қалды. Тек 2020 жылдың өзінде өрт сөндірушілер 186 азаматтың өмірін құтқарған.

Ал 2001 жылы авариялық құтқару отряды құрылды. Оның құрамына сүңгуірлер, кинологтар, құтқару-іздестіру қызметінің мамандары мен химиялық қорғаныстың қызметкерлері енеді. Әрбір бөлім төнген қатердің түріне қарай әрекет етіп, адамның өмірін ажалдан арашалайды. Мамандар үнемі дайындықтарын пысықтап отырады.

Құтқарушылар қауіп төнген кезде өз өмірін қатерге тігеді. Соған қарамастан олар өз кәсіптерін жақсы көреді.

Жандарын шүберекке түйіп жүретін азаматтық қорғаныс саласының қызметкерлері қауіп төне қалған жағдайда көмек сұраған жандарға қол ұшын созуға әрдайым дайын.

Сурет ғаламтордан жүктелген.

Орал қаласындағы "Омега" зауытынан өрт шықты. Зауыттың ішінде бірнеше адам болып, олар өздігінен қауіпсіз жерге шыға алмапты. Абырой болғанда, құтқару қызметінің мамандары оқиға орынына лезде барып, азаматтар қауіпсіз жерге көшіп үлгерген.

Облыс орталығында орналасқан өндіріс ошағында өрт шыққан. Ол ғимараттың ішінде 10 шақты адам болыпты. Қызыл жалын биік ғимаратта орын алғандықтан, азаматтар өздігінен қауіпсіз жерге шыға алмаған. Оқиға орынына екі өрт сөндіру көлігі, бір топ құтқарушылар мен жедел жәрдем көлігі келіп жетті.

Бірінші кезекте сала мамандары өрт құрсауында қалған азаматтарды құтқару үшін білек сыбана жұмыстанды. Құтқарушылар азаматтарды арқан жіптің көмегімен қауіпсіз жерге көшірді. Кейін, қызыл жалын ауыздықталған еді.

Сала мамандары жылдың төрт мезгілінде орын алатын төтенше жағдайға төтеп беру үшін алдағы уақытта оқу-жаттығу жұмыстарын ұйымдастыра бермек.

Төтенше жағдайлар департаментінің мамандары оқыс оқиғалардың алдын алуда! Төтеншеліктердің айтуынша, жылыту маусымында өрт көбейіп, қайғылы оқиғалар белең алады. Осыған орай облысымызда «Біз қауіпсіздікті таңдаймыз» атты ауқымды рейд өткізіліп жатыр. Бұл орайда әсіресе үйлерін көмірмен жылытатындар назарға алынған. Төтеншеліктер күн сайын дабыл қағып, осылайша бұқараға қауіпсіздік ережелері жөнінде ескертеді. Олардың айтуынша, бұл жұмыстар өрт жағдайларының алдын алуға едәуір көмектеседі. Өткен жылы төтеншеліктер 115 өртті ауыздықтаса, оның салдарынан 13 адам мерт болған. Ал жыл басынан бері 3 адам осы қызыл жалынның шарпуынан қаза тапқан. Өрт мәселесі өңірде өзекті. Әсіресе биылғы жылы тілсіз жау белең алып тұр. Оның алдын алуды - бүгінде төтеншеліктер басты назарға алған. Аталмыш шара да 1 ақпаннан бастап қолға алыныпты. Департамент басшылығы да алдымен қызметкерлермен әңгімені өзі жүргізіп, кейін тұрғын үйлерді аралауға кірісті. Топ-топқа бөлінген олар әр үйдің есігін қағып, электрлі құрылғыларды пайдалану ретін, қауіпсіздік ережелерін түсіндіріп жатты. Газ саласының мамандары да бұл шарадан шеткері қалмай, газ плиталары мен пештерді тексерді. Ал ақаулар болған жағдайда, тұрғындардың бірден газ қызметкерлерін шақырулары керек екендігі ескертілді. Бұл ретте төтеншеліктерге еріктілер де сеп болуда. Шаһар көшелері мен сауда үйлерінде арнайы әзірленген үнпарақтар таратылып, көшедегі кезбелерге де отты қолданудың ережелерін айтты. Ауқымды шара 1 наурыз күні қорытындыланбақ.